Shillong, Ïaïong 29: Ka North Eastern Hills University Non Teaching Staff Association (NEHUNSA), kaba dei ka seng kiba trei ha hapoh ka skulbah NEHU, ki la pynpaw ka jingsngewkhia halor ki jingmih ki kynrum kynram kiba la ktah ïa ka University baroh kawei bad khamtam eh ka jingwan ki pulit hapoh ka skulbah NEHU.
Ha ka kyrwoh khubor u General Secretary u Bah Mr Jonathan P. Nongbri u la ong ba ka long kaei kaei kaba ym lah ban khmih lynti ban ïohi ïa ka jingdon jong ki pulit kiba la kieng atiar hapoh ka skulbah ha ka 28 tarik mynta u bnai hapoh ka campus ha kaba kane ka la wanrah ïa ka jinglong jingman kaba ym sngewsuk sngew shngaiñ, bad kaba la lam ruh sha ka jingpynthut bad ka jingsngew bym sngewsuk hapdeng ki kynhun bapher bapher kiba don hapoh ka University.
“Ka long kaei kaei kaba wanrah ka jingeh haba ki bor pynïaid jong ka University kim don jingtip shwa ba kan don ka jingphah ïa ki pulit bad kane ka buh ka jingkylli kaba heh shaphang ka jingdonkam ban da don ka jingïakren ha shwa kaba la dei ruh ban khmih lynti haba wan buh ïa ki pulit hapoh kane ka jaka pule,” ong u Bah Nongbri.
U la ong ba ka seng ka kwah ban banjur ba ka university ka dei ban long ka jaka kaba don ka jingïada na ka bynta ki kam pule bad ki jingkiew ha ka liang ka jingnang jingtip. “Ka thong ba nyngkong jong ngi ka dei ban pynwandur ïa ka sawdong sawkun ka pule puthi kaba ki samla pule, ki nonghikai bad ki nongtrei kin lah ban ïadei kam bad ban ïakren haba shit haba shai. Ha NEHU, ngi pynshongdor ïa ka jingriewspah ka jingïapher ki jait bynriew bad ban ïatreilang hapoh ka sawdong sawkun kaba don ka suk ka saiñ bad ka jingburom markylliang. Ngi ïalong kawei wat hapdeng ki jingïapher bad ngin bteng ban pynneh ïa kane ka jingangnud sha ka imlang sahlang khamtam ha kine ki por ba don ki jingïaleh,” ong Dr. W. R Synrem President bad u General Secretary Bah J.P. Nongbri.
