Ïasoi soskular ka Sorkar Jylla ban pynrung ïa ka ktien Khasi bad Garo ha ka rynsan Bhashini

Shillong, Ïaïong 29: Kum shi bynta ban sah jingkynmaw ïa ka jingpynrung ïa ka ktien bad ka jingnang kiew ka teknoloji, ka Sorkar Meghalaya ka la ïasoi ïa ka soskular ne Mutual of Understanding (MoU) bad ka tnad Digital India Bhashini Division, Ministry of Electronics and Information Technology (MeitY), ka Sorkar India, na ka bynta ban pynrung ïa ka ktien Khasi bad Garo ha ka rynsan Bhashini.
Ïa kane ka jingïasoi soskular ka la urlong ha ka jingïadon ryngkat u Myntri Rangbah ka Jylla Conrad K Sangma bad u Myntri ka Tnad Arts & Culture Bah Paul Lyngdoh. Kiwei kiba la ïadonlang ki kynthup ïa ki dkhot ka Khasi Literature Society bad ka A’chik Literature Society.
La ïathuh ba kane ka Bhashini, ka dei ka flagship program hapoh ka Digital India Programme, ban pynrung ïa ki ktien ha ki kor teknoloji khnang ba ka pyrthei kan tip bad ba kin lah ban sngewthuh ne nang ban kren.
Haduh 22 tylli ki ktien ka Ri India ki la rung hapoh kane ka prokram bad da ka jingpynrung lang sa ïa ka ktien Khasi bad Garo, kan pynlong ïa ka Meghalaya kum kawei na ki jylla ba lah ban pynlong ïa ka ktien ka thylliej ki trai muluk kaba lah ban shem ha ka kor Digital hapoh ka Ri India baroh kawei.
Ha kaba ïadei bad kane, haba kren ha ka jingïalang, u Myntri Rangbah Conrad K Sangma ula pynpaw ïa ka jingsngew sarong bad u la ong, “Mano ban poi pyrkhat ba shisien ka sngi, lyngba ka bor jong ka Artificial Intelligence, ba ngin lah ym tang ban pynkylla ktien ïa kaei kaba ngi ong ne mut da ka kor digital? Ka teknoliji mynta ka la poi ha kawei pat ka kyrdan kaba ym ju don ba poi pyrkhat satia. Kane ka sienjam kan don ka jingktah kaba khraw ha baroh ki liang jong ka imlang sahlang bad ka synshar ka khadar, naduh ka ïakren ïakhana ha ki shnong ki thaw sha ka jingpynkhlaiñ ïa ki kam jngohkai, ka jingsengkam, ka pule puthi bad ha ka liang koit ka khiah”.
Halor ka jingktah kiba kham ïar, u Conrad ula ong, “Kane ka jingthmu kan pynkylla dur ïa ka rukom ïakren bad ïatreilang jong ki tnad sorkar bad ki nongshong shnong. Kan plie ïa ki lad thymmai ïa ki nongseng kam seng jam bad kan ïarap ban pynlong ïa ka synshar khadar kaba kdup lang ïa baroh bad kaba treikam bha. Nga pynshlur ïa baroh ban pyndonkam ïa ka teknoloji ban pynïaid shakhmat ïa ka jingthaw kam thaw jam, ka jingwanrah ïa ki buit treikam ba thymmai, bad ka jingsengkam sengjam.”
Kum shi bynta ban pyntreikam nyngkong, la thaw ïa ka State Language Mission na ka bynta ka Bhashini hapoh ka jingïalam jong u Chief Secretary Bah D.P Wahlang. Ka Mishon kan pynthikna ïa ka jingpynïasoh kaba khlem jingeh, ka jingwad bniah, bad ka jingpynroi ïa ki ktien Garo bad Khasi lyngba ki kor digital, kynthup ïa ka jingpynrung ïa ki dak thoh ba kyrpang bad ki jingpher ba ïadei bad ka ktien.
Halor kane u CEO ka Digital India Bhashini Division, Amitabh Nag bad Commissioner Secretary, IT Department Pravin Bakshi kila ïasoi ïa kane ka soskular MoU ban pyntreikam ïa ka prokram hapoh ka Jylla kaba ban long ka jingmyntoi kaba khraw.