Jowai, Jymmang 14 : Ka Khasi Students’ Union (KSU) Lapangap Unit West Jaiñtia Hills District ka pynpaw ïaka jingsngewkhia halor ka jingbym ïoh ryntih ki nongrep ïa u symbai kba naka tnad Agriculture jong ka sorkar.
Ka seng haba wad bniah ïaki jingtip ha kaba ïadei bad u symbai kba (arize hybrid rice seed) na ka liang ka tnad ba dei ban sam ïa une u symbai kala pyndonkam bakla ha ka ban sam ïa une u symbai bad kane kala pynbitar ban lap ïa kum kane ka jingtorti jong ka tnad ka rep ka riang.
Bunsien ki nongrep haba ki leit shim symbai kila ïoh jubab pynban ‘ym don kba shuh’ tangba balei pat ïa une u kba lah ban ïoh na dukan haka dor kaba rem, kane ka pyni shai ba ym don jingmut ban summit ïaki kot (documents) naki nongrep ban ïoh ïa une u kba bad ka don ruh ka jingsuba jur ba ïa une u kba symbai ka don beit ka leakage, la kynnoh jur ka seng.
Halor kane ka seng ka buh ïaka jingkylli haba la lut une u symbai kumno pat ha ki dukan dang lah ban ïoh ïa une u symbai? haba ïa une u symbai ki nongrep ki don ka hok ban ïoh ïaka subsidy.
Kum ka seng ka kwah ban ïoh ka jingpynshai na kane ka tnad lym kumta kin hap ban ïaid da kawei pat ka lynti, la pynkut ka kyrwoh khubor na u General Secretary ka Lapangap Unit samla Saikial Sumer.
