Ka shong ha ka rai jong ki paidbah haba ïadei bad ka kam lynti rel, ong u Bah Kyrmen Shylla

Shillong, Jymmang 14: U Myntri Sorkar bad MLA ka UDP na Khliehriat u Bah Kyrmen Shylla ha ka sngi Balang u la pynpaw ba u kwah ïa ki paidbah ka ri-lum Jaiñtia ba kin shim rai la ka jingtyrwa ban pyntrei ïa ka project lynti rel kan ai jingmyntoi ne em ïa ki nongshong shnong.
Ha kaba ïadei bad kane u la ong, “Ha nga shimet hi, nga kwah ïa ki paidbah ka ri-lum Jaiñtia ba kin shim rai halor ka kam lynti rel.”
Shuh shuh halor kane u la ban jur ïa ka jingdonkam ba ka Sorkar Jylla kan pynlong ïa ka public hearing ka ban ai ka rynsan ïa ki paidbah ba kin pynpaw ïa ki jingsngew bad ki jingai jingmut halor ka jingtyrwa project lynti rel ha East Jaiñtia Hills District.
U la ong, “Ngi dei ban pynlong ïa ka public hearing bad ai ba ki paidbah ki rai halor kane ka kam naba kam dei ïa u bah Kyrmen ne ïano ïano ruh ban shim rai. Ai ba ki paidbah kin rai la ka lynti rel kan ai jingmyntoi ne em ïa ki bad ïa ka thaiñ.
U Myntri ula ong ruh da kaba bynrap, “Lada ki paidbah ki ong em ïa ka lynti rel, ha kane ka sngi hi ngi dei ban buh da u fullstop ïa kane ka kam. Lada ki paidbah ki ong hooid, balei tang ka Sorkar ka dei ban kyrshan, balei ki Sengbhalang, balei ym dei baroh?”.
Haba kylli, u Bah Kyrmen ula ong, “Ngi la ïohsngew ïa ki sur bapher bapher bad ki jingai jingmut bad jingkynthoh bapher bapher halor kane hynrei uba bun paid hi un jop haba kut”.
“Namar kata, ngin ieh beit ha ki paidbah ba kin rai. Nga don ïa ka jingsngew ba lada ki paidbah ki kwah shisha, ka dei ban jia. Lada ki long pyrshah, balei ba ngin pyntreikam ïa ka. Kane ka long namar ba kano kano kaba ngi leh, ka dei beit na ka bynta u paidbah,” bynrap u Bah Shylla.