Nongpoh, Ïaiong 26: Ka HYC Ri Bhoi Sepngi ka la pynpaw ïa ka jingsngewkhia kaba jur halor ka jingshah ktah palat ki paidbah jong ki shnong ba hap ha ka thaiñ Ri Bhoi Sepngi, kaba dei na ka daw ka jinglip bording kaba khah khah kaa la ktah ïa ki kam ki jam bad ki jingdonkam jong ki paidbah katei ka thain kaba ha kane ka juk ba mynta ki donkam ïa ka bording kaba thikna.
Ka Seng HYC Ri Bhoi Sepngi ka la pynpaw ruh ïa kane ka jingsngewkhia na ka jinglip bording palat sha katei ka thaiñ, ka dei hadien ba bun ki paidbah ki la wan ud wan nam sha ka seng ban ïa kren lem halor kane ka jingeh, ha kaba nalor ka jingpynlip bording ka sorkar (Load shedding) wat ha ki kynta bym don ka jingpynlip bording ruh ka bording ilektrik kam biang thikna sha katei ka thaiñ.
Katkum ka kyrwoh ba la phah da u General Secretary ka HYC Ri Bhoi Sepngi, u Bah John Makri, u la ong ba ka seng ka da sngewkhia shisha halor kane ka jingpynlip bording kaba khah khah bad u la pynpaw ruh kane ka la ktah shisha ïa ki paidbah khamtam ka jingpynlip bording ka sorkar kata naduh ka por 5 baje janmiet haduh ka por 9 baje mynmiet ka la ktah bha ïa ki paidbah ha kaba kane ka por ka dang dei ka por ba ki paidbah ki dang donkam bhai a ka bording ilektrik.
U la ong ruh ha katei ka por kiba bun ki khynnah skul ki hap ban pule kot, ki paidbah ruh ki hap ban shet ban tiew bad ban leh kiwei kiwei ki kam kiba donkam ïa ka bording ilektrik bad lada pynlip pat ha katei ka por ba la buh da ka sorkar kane ka la ktah shibun eh ïa ki paidbah.
U la bynrap ruh da kaba ong, kaba kham sngewsih ka long ba wat ha ka por ba ym dei ka por ban pynlip bording kumba la buh por da ka sorkar, ki paidbah kim ioh satia ïa ka bording ilektrik bad kane ka la ktah shisha ha kaba ka jinglip bording ka la long sha ba palat kaba la pynduhnong ïa ki kam ki jam ki paidbah.
Namar kata, na ka liang ka seng ka kyrpad ruh ïa ka sorkar bad ka tnad MeECL ba ki shim khia ban pynbiang bording ïa ki paidbah katei ka thaiñ bad khamtam ban pynjynsur ïa ka rukom pynlip bording (Load Shedding) kata na ka 5 baje janmiet sha ka 9 baje janmiet, kane ka la ktah shisha ïa ki paidbah ha baroh ki liang khamtam katei ka por kaba ki paidbah ki donkam bha ïa ka bor jingshai jong ka bording ilektrik, u la bynrap.
