Shillong,Rymphang 8 : Ka Iing Bishar High Court (DC) jongka jylla ka pynpaw ka jingsngewkhia jur halor ka jingsniew palat ka surok bah NH-6 kaba ïaid lynba ki bynta ka East Jaintia Hills District.
Ha ka hukum ba la pynmih da ka iing bishar ha ka dorkhast ba la ai da u Kynjaimon Amse la pynpaw ba ki don ki dur kiba la shon bad suhlang bad la pynpaw ruh ïa kine ki dur la shon dang ha ka 26 tarik Kyllalyngkot 2024 ha ka shnong Sonapyrdi, hajan Sonapur Tunnel, Kuliang, Pyrtang, Dona Umbluh bad Rattacherra-Malidor.
Ha kine ki dur la pyni ka jingsniew ka surok ka la nang jur ha ka shnong Kuliang bad Pyrtakuna.Nalor kane la ïohi ruh h aka dur ba ka jingkieng ïaid kali ka la sniew haduh katta katta ha kaba ym i long shuh wat tang ban ïaid ki kali ruh.
Na ka liang u nongïasaid ain ka sorkar u S Senggupta u la pyntip ba la dep khot tender bad la dep ai ruh ïa ka kam ban pynbha noh ïa ka surok kumta u la pan por na ka iing bishar ban wad jingtip na kaei ka daw ym pat sdang ban pynbha ïa ka surok.
Halor kane u Senggupta u la ai ïa ka jubab ha ka 6.2.2024 ba la soi da u Project Director ha kaba la ïathuh ha kaba ïadei bad ka jinglong jingman jong kane ka surok NH-6 kaba dei naduh Jowai shaduh Ratacherra kat haduh ka 5.2.2024. Kumta na ka liang ka iing bishar ka la bthah ba dei ban pynsted noh ban pynbha ïa kane ka surok.
