Sngewbha pyntreikam hok ïa ka mang pisa sha ki Muster Roll, ym ban pynlutkai sha ki tamasa: AMMRWU

Shillong, Nailar 06: Ka All Meghalaya Muster Roll Workers Union (AMMRWU) kaba ïasoh lang ki jingtreikam bad ka All India Trade Union Congress (AITUC) ka la dawa na ka Sorkar Jylla ba kan pyntreikam pura ïa ka RCW rule 1996 ne kaba ki khot ka Meghalaya Regular Casual Workers Scheme 1996 halor ka jingthung kam ïa ki nongtrei kiba lah trei slem lyngba ka 50:50 ratio.
Haba kren sha ki lad pathai khubor u President ka Union u Bah Ricky Thabah bad u General Secretary u Bah D Kharbuli ki la ïathuh ba ka RCW rule kadei kaba la ailad ïa ki nongtrei Muster Roll kiba la trei slem ba kin shah pynskhem noh ïa ka kam kaba ki trei lada don kano kano ka jinglait thylli jong ki kam Sorkar ha ki Tnat bapher bapher.
Halor kane u Bah Kharbuli ula ïathuh ba kane ka rule ka ailad shah pynskhem jong ki nongtrei kiba la slem ha ka kam, kaba mut lada lait kino kino ki kam ha ki tnat sorkar dei ban thep beit ïa ki Muster Roll kiba la trei slem da 50 na ka 50 bad kine ki kam ba lait kin dei ha ka Group D.
Hynrei u la pynpaw pat ka jingsngewkhia ba kumba ka long mynta ki tnat Sorkar ki phah beit ïa ki jingpynbna lait kam lyngba ki District Selection Committee bad pynduh noh ïa ka bhah kaba 50% ïa ki nongtrei Muster Roll kiba la trei slem.
U la ong ba lada don 2 tylli ki post ba lait dei thep kawei ïa ki nongtrei Muster Roll ba la trei slem bad ïa kawei pat dei ban sha ki DSC jong ki district, kaba long ruh katkum ka RCW rule.
Kumta u la kyntu ïa ka Sorkar ba kan pyntreikam pura ïa kane ka rule.
Halor ka jingpynslem ban siew ïa ki bainong kine ki nongïalam ki kyntu ruh ïa ka Sorkar ba kan pyndonkam hok ïa ka pisa ba la mang hapoh ka Budget ym ban pynlut kai noh sha ka jingpynlong ïa ki tamasa hynrei kaba ktah pat ïa ki Muster Roll baroh.
Ha kawei ka liang u President ka Union u la ai khublei ïa baroh ki Chief Engineer, ki ophisar jong ki Tnat bapher bapher ba ki la shim khia ban pynlait noh ïa ka tulop kaba dangsah jong baroh kiba trei Muster Roll da kaba kyntu ruh ïa ki ba kin ïai bteng ban trei shitom ban pynlait beit ïa ki tulop manla u bnai.
U la ïathuh kumba ka long mynta dei tang ka PHE kaba pynslem haduh 4 bnai ka tulop ki Muster Roll hynrei baroh ki tnat kum ka PWD, Agriculture bad kiwei ki shait siew manla u bnai.
Lah ban ong ba ka RCW rule 1996 kadei kaba la wanrah ha ka 16 tarik u Nailur 1996 lyngba ka Office of Memorandum da ka sorkar jylla ban shna ki kyndon halor ka bai bylla bad ban ai ki lad jingmyntoi ïa ki Muster Roll ba bylla sngi bad kumjuh ruh ïa ki nongtrei Casual.