Sngew thamula ban pyrkhat hadien ba la mynjur ïa ka Bill ïakhalai ha Assembly yn sa pyrshah: Ampareen

Shillong, Jymmang 17 : Ka MLA jongka East Shillong Constituency I kong Ampareen Lyngdoh i la ong ba ka long kaei kaei kaba sngew thamula ban pyrkhat ba hadien ba la mynjur ïa ka bill ïa khalai ne ka Gambling Bill hapoh ka ïing dorbar thawaiñ Assembly ha u snem ba la dep mynta pat ki dang ïa pyrshah lut.
“ Kane ka long kaei kaei kaba ki paidbah ka jylla ki ju mlien haba wanrah ïakane ka Gambling Bill hapoh ka ïing dorbar ngi kum ki nongmihkhmat ne MLA ngi pyrshah jur hynrei ki paidbah ki ïoh thiah imat ha kato ka por hynrei mynta pat hadien ba la dep mynjur sdang ban kyndit bynriew”. ong I kong Ampareen.
I la ong ba ka jingpyrshah ïa kane ka bill kam don jingmyntoi shuh namar la dep mynjur ïa ka hapoh ka ïing dorbar. “ Mynta ka sorkar ka la dep ïoh ka jingmynjur halor kane ka bill hapoh ïing dorbar thawaiñ, nga tharai kane ka jingpyrshah da kiba bun kam don jingmyntoi shuh. Ngi la dei ban pyrshah naduh ka por ba wanrah ïa kane ka bill bad shwa ba kan ïoh ka jingmynjur hapoh ïing dorbar” ong I kong Ampareen.