Shillong, Jymmang: U MLA ka Mawlai u Bah Process T Sawkmie hynne ka sngi Hatmajai u la pyllait ïa ka kali kit nongpang ka Ambulance ha Mawsiatkhnam PHC, kaba la mang ba kan shakri ïa ki san tylli ki shnong kiba kynthup ïa ka Um Rynjah, Umphrew, Madan Mawkhar, Nongkohlew, nalor ka Mawsiatkhnam.
Ha ba ai jingkren ha kane ka sngi u Bah PT Sawkmie u la pynpaw ïa ka jingkmen kaba khraw ba la ïoh ban pynurlong ïa ka jingangnud kaba la slem bha ban pynïoh Ambulance ïa ka PHC Mawsiatkhnam na ka bynta ban pyndonkam ïa kane ka thain jong san tylli ki shnong, kiba la donkam kyrkieh bha ïa ka.
U la ong ruh ba u sngewkmen shibun halor ka jingïoh ïa kane ka ambulance, hynrei donkam pat ïa u nongñiah jong ka ba u dei ban sah ha Quarter jong ka Mawsiat khnam PHC bad ban sumar bha ïa ka bad na ka bynta ka jingbit jingbiang jong ka ambulance, kin sa thaw ïa ka komiti kaban khmih ïa ka.
U la ong ruh ba ha kane ka komiti kin don ki rangbah shnong, secre tary, ki doctor bad kiwei. Nalor kata u la pynpaw ruh ba kiba pyndonkam ïa ka ambulance, kin sngewbha ban ai ïa ka bai umphniang bad lada kim kot bor kin phone ïa u MLA bad un sa khmih ïa kaba donkam.
Ha kane ka sngi la don lang ki Rangbah shnong jong San shnong, ki DMHO, ki doktor, ki ASHA ki Akanwadi, ki khynnnah skul bad kiwei kiwei.
La ïoh ruh ïa ka jingkren na ka Dr. S. Lyngdoh, Additional DMHO, kaba pynïaid ïa ka jingïalang, na ka Dr, A. Lyngdoh, ka DMHO, na u rangbah shnong ka Mawsiatkhnam u bah Shemphang Wahlang, na u bah B. Thangkhiew u president ka synjuk ki san shnong, u bah Wamlamkupar Lynrah, Secretary shnong Mawsiat-khnmat bad kiwei kiwei.
Ha ka jingkren jong ki ki la pynpaw ïa ka jingsngewnguh ïa u MLA uba la lah ban pynïoh ïa ka ambulance kaba kum ka thaiñ ka donkam bha.
Kumba shu kdew ka Mawsiatkhnam PHC ka dei ka matti u bah PT Sawkmie ba la plie ha ka 7 tarik u Nohprah, 2002 da u (L) Dr. F. A Khonglam, uba long u myntri rangbah ka jylla ha kato ka por.
