Sngew sarong u President MFA ba ïalehkai bha ka Shillong Lajong ha ka Durand Cup
Ïaroh ïa ka Samla Ri-Ïohlang ba shah jied pynïaid ïa ka FIFA U-17 Women’s World Cup
Shillong,Nailar 20 : U President jong ka Meghalaya Football Association (MFA) Bah Hamlet Dohling ba dei ruh u Chief Adviser jong u Myntri Rangbah ka Jylla ha ka sngi Ba-ar u la ai ka jingkitbok ïa ka kynhun ïalehkai jong ka Shillong Lajong FC kaba la poi shaduh ka Quarter Final jongka Durand Cup.
U Bah Hamlet u la ong ba ha kane ka lympung ki ïohi shisha ïa ka sap kaba tbit bad kaba kynsai jong ki samla Khasi namar ki ïoh ïa ka lad ban tynjuh bor bad kiwei pat ki kynhun kiba la aireng kum ha ka Indian Super League kiba don ïa ki rangïalehkai kiba kynsai.
“Nga ai ka jingkitbok ïa ka kynhun ïalehkai jong ka Shillong Lajong FC ba kin lah ban ïalehkai bha ha kane ka Quarter Final pyrshah ïa ka East Bengal,” u la ong.
Lah ban kdew hangne ba ka Shillong Lajong kan hap ban ïakhun pyrshah ïa ka East Bengal ha ka Quarter Final kaban long ha ka janmiet sngi Balang, ka 21tarik ha Madan JN Stadium, Polo Shillong ha ka por 7:00 baje janmiet.
Ha kajuh ka por u Bah Hamlet u la ai ruh ka jingïaroh ïa ka samla Ri-Ïohlang Dhar kaba ka la kylla long ka kynthei kaba ar ha ka histori kum ka assistant referee jong ka ri India ban shah jied na bynta ka lympung ïalehkai jong ka FIFA U-17 Women’s World Cup.
Kane ka lympung mynta u snem kan long ha Dominican Republic kaba ha Caribbean. ïa kane ka jingshah jied jong ka Ri-ïohlang la pynthikna lyngba ka thup kyrteng ki 38 ngut ki nongpynïaid ïa ki jingïalehkai lane ki match official ba ka FIFA ka la pynbna ha ka Sngi Thohdieng ba la dep na bynta kane ka lympung ban sdang naduh 10 tarik u Risaw haduh 03 tarik u Naiwieng mynta u snem.
Halor kane, u Bah Hamlet u ong ba kane ka jingshah jied jong ka samla Ri-ïohlang ka la ong ka burom kaba khraw ïa ka Meghalaya kaba la lah ban sei ym tang ïa ki nongïalehkai kiba kynsai hynrei ruh wat ïa ki nongpynïaid kiba la tbit bha ban pynïaid ïa ki jingïalehkai kiba heh bad kiba pawnam ha ka pyrthei.
“Ka jingmait lynti jongphi kan long ka jingai mynsiem ïa kiwei pat ki khun samla kiba kwah ban long ki referee kumjuh kum ki nongïalehkai,” u la ong.