Sngew sarong ka RSS&CC bad ka DS Iewshyllong ba mih ar ngut ki rangïalehkai phutbol ba kynsai

Shillong, Jylliew, 29: Ka long ka khubor kaba sngew sarong bad kaba sngewtynnat haduh katta katta ïa ka phutbol ka jylla Meghalaya bad khamtam eh ïa ka Ryntih Sports Social and Cultural Club, ka dorbar shnong Iewshyllong, kaba hap hapoh ka Elaka Laitlyngkot, East Khasi Hills District, kaba la lah ban sei ïa arngut ki rangïalehkai phutbol kiba kynsai.
Kine ki arngut ki rangïalehkai phutbol ki dei kiba la tip kyrteng kum u Ronney Wilson Wilson Kharbudon, uba la 22 snem ka rta uba lehkai na ka Goa Football Club bad u Ricky John Shabong uba la 22 snem ka rta uba mih madan na ka Punjab Football Club.
Baroh arngut kin ïohlad ban mih madan ha ka lympung ïalehkai ba hakhlieh duh jong ka India, ka Indian Super League jong ka samoi ïalehkai 2025-2026 ka ban sa sdang shen ha kine ki bnai ban wan.
Khyndiat, u Ricky John Shabong u dei ruh u rangïalehkai uba la mihkhmat ïa ka kynhun ïalehkai phutbol Under-16 jong ka India kaba la poi sha ka Quarter Final ha ka Under-16 AFC Cup Championship kaba la long ha ka ri Malaysia ha u snem 2018, katba u Ronney u dei u rangïalehkai barim jong ka Shillong Lajong FC ha shwa ba un leit pynïasoh ïalade bad ka kynhun ïalehkai ISL, ka Goa Football Club.
Kum ka jingkitbok kitrwiang na ka liang jong ka Ryntih Sports Social and Cultural Club bad ka Dorbar Shnong Iewshyllong ha ka 27 tarik Jylliew, 2025 ki la pynlong ïa ka jingïalang ban pynkup burom ïa kine ki samla ha kaba la wan sakhi lang da u MLA ka Sohra u Bah Gavin M. Mylliem uba la long kum u kongsan.
Nalor kiwei dei kiba la don ryngkat ha kane ka sngi ki long u CEM ka KHADC u Bah Shemborlang Rynjah, u Sirdar jong ka Elaka Laitlyngkot u Bah Allenson Shabong, u Bah Ryngkatlang Lyndem, Rangbah Shnong Dong Iewshyllong, ki nongkitkam ka Ryntih Sports Social & Cultural Club.