Sngew nongwei u Paiem Ainam ha jylla lajong ba la bun ki Consultant kiba wan nabar

Shillong, Nohprah 12: Ka KSU Mawkhar circle ha ka sngi Palei halor ka phang ‘Ka jingjop bakhraw barabor ka donkam ïa ka jinglenlade bad ka jingaiti lut, ka la pynlong ia ka prokram pynkupburom ïa ki samla pule bad kiba la wanrah nam ïa ka jylla bad ïa kane la pynlong ha Community Hall Mawkhar Dorbar Shnong.

  Kane ka jingpynkup burom ka long na ka bynta ki samla pule naduh SSLC haduh Master Degree ba kynthup ïa kiba wanrah nam ha ki jingïalehkai bapher bapher.

U Paiem Ainam Manik Syiem Syiem Hima Mylliem, u la long u Kongsan uba la pynpaw ïa ka jingkmen ïa ka KSU Mawkhar circle kiba la leh ïa kane ka kam kaba bha tam ban ithuh ïa ki samla pule bad ki sap ki phong bad u la ai khublei ïa baroh kiba la wanrah nam kynthup ha ki kam sports bad kilan met bapher bapher.

Katba u samla Raymond Kharjana Organizing Secretary KSU Sengkmie u la long u Symbud Kongsan uba la ai jingkren bad kyntu ïa kiba la wanrah nam ba kin ïaibteng ban ïaid shaphrang ban don jingthmu ban ïakhun ïa ki Civil service khnang ban ïoh pynïaid hi ïa u lakam synshar ha la jylla la jong.

  Na ka liang I Kong Silbi Passah Padmashree Awardee I la ai jingkren bad iba la shah pynkupburom ha ka KSU da u Samla Fredrick Myrthong president KSU Mawkhar circle, nalor kiwei kiwei pat ki prokram, i iaroh ia ka KSU.

  U Paiem Ainam haba kren kum u kongsan u la ong ba u dap da jingkmen bakhraw ban don bynta lang bad ai khublei ïa ki samla kiba la wanrah nam wanrah burom.

  “Haba peit shaphang ka pule puthi la sngew kumba long nongwei ha ri la jong, khamtam ha secretariat naba ïa u la kam synshar la pynïaid da ki briew nabar, khamtam ba la wan bun ki consultant na shabar. Kumta ki mih ki aiñ bapher bapher kiba pynrit mynsiem ïa ka jaitbynriew, kumta ka jingdon ka KSU, FKJGP ki la long ki nongïada.

Kumba ka phang kane ka prokram kadei, ‘ka jingjop bakhraw barabor ka donkam ka jinglenlade hynrei kane ka long khongpong naba ha ki Social media ki la pynhiar dor ïa ka jingburom markylliang bad la bun sa tang ki jingthad khlem ki nongrim. Nga da kwah ba ki khun samla ne ki briew lajong ban tehlakam ïa u lakam synshar hi hapoh ka Jylla naba lada ki don la ka jong, ym donkam consultant nabar,” ong u Paiem.

  Katba u Bah Raymond Kharjana Organizing Secretary KSU Sengkmie Symbud Kongsan u la ai burom ïa ka KSU Mawkhar circle, I Kong Silbi Passah bad ïa ki Samla kiba la don ka sap ban rwai, kyrpang ïa kito ki samla pule bad kiwei kiba la ïoh khusnam na kiwei ki kam.

  U la ong, “Iwei i longkmie i la pynkynmaw ba i khun jong i ila ïoh ka khusnam na ka KSU bad hadien kane i la ïoh ka khusnam da ka song pisa. Ïa kane ka achievers Award la sdang da u samla Nongbet ba la khlad noh ka seng, bad kane ka la ïaid shakhmat khamtam ïa ka sorkar ka la sdang ban ithuh ïa kiba la wanrah nam. Mynshwa la leh beit da ka sengkmie hynrei mynta la leh noh da ki shnat ka KSU. Kane ka jingïoh khusnam kadei tang ka jingsdang bad ban ïaid ha ka lynti ki jingïaleh watla kin don ki mawjynthut bad tang kito kiba ïakhun bad treishitom kin poi sha kliar lum ka nam,” ong u samla Raymond.

  “Ha ki night club, tamasa ki khynnah Khasi jong ngi ki long hakhmat hakhmat hynrei ban leit sha ki jaka die kot duna ki Khasi. Ka KSU ha kine ki kyndiat bnai kan sa phah biang ïa ka coaching ha ki Civil service khnang ban pynleit jingmut ha ki jingpule, nalor kine ngi donkam ha kiwei ruh ki kam, tangba kane ka Civil service ka dei ka lynti ban wanrah ïa ka jingshngaiñ ha ka ri bad ka jaitbynriew,” u la ong.

  Katba u samla Frederick Myrthong president KSU Mawkhar circle u la ong ba kane ka long manla u snem bad kane ka long ka jingai mynsiem, ban pynshlur bad khamtam ban don ka mynsiem jingïaleh khamtam bad kiwei ki jaitbynriew ha ka pule puthi khamtam ba mynta naduh ki kyrdan baheh ha ki kam sorkar la trei da kiwei kiba nabar jylla.

  Halor ka jingai khusnam ha ki sports pat u la pynshlur ïa ki samla ha ki kam ïalehkai naba bun ki samla ki la ngop ha u drok bad kiwei ki jingdih ba sniew.

  I Kong Silbi Passah Padmashree Awardee i la ai khublei ïa ka KSU halor kane ka jingai khusnam naba kane ka la ai mynsiem ïa ki samla ban trei shitom.

  Haba ai nuksa ïa u Bah Paul Lyngdoh u Nongïalam barim ka KSU uba la long mynta u Myntri sorkar uba la pynneh pynsah ïa ki riti dustur ka jaitbynriew, i la ong ba ka KSU ka la sei shibun ki nongïalam.

  Ha kane ka sngi la pynkupburom ïa i Kong Silbi Passah da u President ka KSU Mawkhar circle u Bah Frederick Myrthong.

  La pynïaid ïa ka jingïalang da u samla Cleenstar Shabong Assistant Organising Secretary KSU, la pdiang sngewbha da u samla Wanmi I Khongjah Assistant Publicity Secretary KSU,

  La pynbna ïa ki nongïoh khusnam da u samla Gerarld Ford Langstieh Sports Secretary ka KSU Mawkhar circle bad kyntien ai khublei na u secretary ka KSU Mawkhar circle u samla Samuel K. Chandi. Kiba ïoh khusnam ki dei naduh kiba la pass bha ïa ka SSLC, HSSLC, Graduate, Post Graduate bad master degree, baroh ki long 17 ngut kiba pass bha bad 11 ngut kiba wanrah nam ha ki jingïalehkai sports.