Slem palat ka jingpynbna ïa ka elekshon MDC ïoh thiah lyngai ki seng saiñ pyrthei

Nongstoiñ, Risaw 07: Ka jingpynslem jong ka Khasi Hills Autonomous District Council ban pynbna ïa ka elekshon MDC, baroh ki seng saiñ pyrthei ki dang thiah suk kynjai lait noh ki nongïalam jong ka Voice of People Party kiba tur sha ki jaka bapher bapher, ban pynpaw ka jingai khublei kyrpang na ka bynta ka jinglong kawei ki paidbah ha ki dong bapher bapher ka jaidbynriew, ban kyrshan bad ai jingjop don burom ïa u Dr. Ricky A.J Syngkon u ba dang shu jop ha ka MP Election ba la dep.
Na ka liang kiwei pat ki seng saiñ pyrthei ba kynthup ïa ki National Party kum ka Indian National Congress, Bharatya Janata Party, National Peoples Party kaba ïalam ïa ka sorkar MDA II ha ka jylla, Trinamool Congress, nangta ki Regional Party kum ka UDP, HSPDP, KHNAM, PDF bad wat ka kiwei kiwei imat ki dang ïoh thiah lyngai.
Haba phai sha ki lai tylli ki constituency ha West Khasi Hills, na ka liang ki nongïalam jong ka VPP ki la jan poi lut ha baroh ki constituency kata ha Rambrai Jyrngam ki la dep ban pynlong jingïalang, ha Mawshynrut ki la dep bad ha ka sngi thohdieng ban wan kin leit sa sha Langpih.
Ym lah ban len ba ha man ki jaka ba ki nongïalam ka VPP ki leit ban pynlong jingïalang, ki paitbah ki tuid ban ki ïabeh bha ban leit sngap. Kumba ka paw bad kumba ka long mynta, lada ha ka elekshon MDC ban wan lada ki paitbah kin tylli kawei kumba ki long ha ka por ba pynlong jingïalang, kiwei ki party te kim don jaka shuh.
Katei ka jingtuid jong ki pait bad ka jingshong shit jong ki ha ki jingïalang, ka la pynlong ïa ki nongïalam ka VPP ba kin sngew khlaiñ bad kyrmen skhem ba ha ka elekshon MDC ruh kin poi sha ka thong.
Nalor kata wat ha ki constituency ba ki paitbah nongthep vote ki la ïakhleh lang bad Khasi bad Garo ruh kim don jingartatien ei ei shuh ba wat ki paitbah Garo ruh kin kyrshan lut ha ka VPP. Katei ka jingkyrmen jong ki ka lah ban urlong ne kam lah ban urlong ïa kata ym lah ban ong lypa namar ka elekshon MDC kan dang kham shim por.
Haba phai pat sha ka Nongstoiñ constituency naduh ba u bah Gabriel Wahlang MLA/MDC na ka Indian national Congress u la leit ban pynïasoh bad ka National Peoples Party, ki don bun ki paitbah nongkyrshan ki bym sngew tynnad satia. Haba pyrshang ban kylli na ki la ki leit noh sha kiwei ki party ne kin ïaineh ha ka Congress, ki la ong ba kin ym kynriah satia na ka Congress namar ba shuwa ba u MLA un leit pynïasoh sha ka NPP, um shym la kren ei ei sha ki paitbah nongkyrshan lait noh tang ha ki katto katne ngut leit ki nongkitkam jong ka party.
Haba pyrshang ban wad jingtip na ki nongkitkam ka NPP pat kim pat ai kano kano ka jingpynsngewthuh, hynrei ki la shu ong ba na ka bynta ka elekshon MDC kin sa peit ynda la dei ka por. Haba pyrshang ban kylli ïa ki nongïalam jong kiwei pat ki party la kin pynïeng kyrtong ne em ha ka MDC elekshon ban wan, na ka liang ki nongïalam ka UDP haduh mynta kim pat ai kano kano ka rai la kin pynïeng kyrtong MDC ne kim pynïeng, namar kin dang hap ban ïakren bad ki nongïalam jong ka central body.
Na ka liang ka HSPDP pat katkum ka jingïathuh jong u bah Eksatnly Lyngkhoi uwei na ki nongïalam ba radbah jong ka party, u la ong ba hapoh une u bnai Risaw ki nongïalam jong ka party kin sa ïashong pyrkhat bad kin sa pan jingmut ruh na ki nongïalam ka Central Election Committee.