Nongstoiñ, Nailur, 3: Kum shi bynta ban pynkhreh ïa ka Miss Meghalaya bad Miss Teen Meghalaya, ha ka sngi saitjaiñ jong ka taïew ka kynhun ki thei bhabriew jong ka jylla Meghalaya, ka la hiar sha ka thaiñ jong ka West Khasi Hills District, ban pynkhreh ïa ki katto katne ki jingdonkam ïa ka ban shon dur ring video bad kiwei kiwei.
Ha katei ka sngi la ïapoi haduh 38 ngut ki samla kynthei kynthup ïa ki 19 ngut ki ban ïakhun ïa ka Miss Meghalaya bad 19 ngut ki Miss Teen Meghalaya ki ban ïashimbynta ban ïakop ïa ka nam lahduh ha ka kyrdan kum kata ka Miss.
Kane ka kynhun shuwa ba kin sdang ïa la ki program, ka la ïoh ruh ban thung ïa ki dieng ha Mawphanlur. La ong ruh ba ka dei shi bynta ban ai ïa ka khubor sha ka imlang sahlang ba ka jingpynneh pynsah ïa ka Mei Mariang, ka long kaba kongsan na ka bynta u khun bynriew. Ïa katei ka kam thung dieng la lamkhmat da ka samla Irene Dkhar kaba dei ka Miss Meghalaya 2022, Femina Miss India Meghalaya 2023 bad Miss Northeast 2022 ha ryngkat ka jingïadonlang I kong Ibalawanpynhun Wriang bad kiwei kiwei.
