Shwa ban sdang ka I-League, wer ka Shillong Lajong ïa ki paidbah ban pynrung kum ki dkhot ba pura

Shillong, Naiwieng 05 : Kum ka jingpynkhreh na bynta ka lympung ïalehkai I-League kaban sdang naduh ka 22tarik mynta u bnai, na ka liang ka Shillong Lajong FC kaba dei ka kynhun ïalehkai kaba pawnam na ka jylla, hynne ka sngi Ba-ar ka la kyntu ïa ki paidbah ka jylla ba kin wan ban pynrung kyrteng ïalade kum ki nongkyrshan ba pura.
Haba kren bad ki lad pathai khubor, u nongai ktien jong ka Shillong Lajong Bah Seibor Sana bad kumjuh u CEO jong ka klob, u Bah Habamutlang Lyngdoh, ki la pyntip ba katei ka jingpynrung dkhot ka long da ka thong ba kito ki dkhot ba pura kin ïoh ïa ka bhah kaba kham kyrpang haba ki wan ban peit ïa ki jingïakhun jong ka klob.
Ki la pyntip ba ki jingmyntoi ba kum ka klob ka lah ban ai ka long wat haduh mar shiteng na ka dor bai tiket nalor ki jingai kyrpang na ka bynta kito kiba pynrung dkhot ha kata ka thup Gold membership kaba long 3500 tyngka. Kine kin ïoh naduh ki official jersey, ki tupia, ki jingdeng bad ki tiket haman la ki jingïakhun bad kumjuh 50 percent yn duna ka dor bai tiket ha man ki jingïalehkai.
Ha ka Silver Membership card kaba long 2500 tyngka, ki dkhot kin ïoh ïa ka jersey (replica), ki jingdeng (keychain) bad ki ticket ha man la ki jingïalehkai I- league bad kumjuh 50 percent ka jingduna dor ha kaba ïadei bad ka ticket ha man la ki jingïalehkai I-league kaba sdang naduh ka dor 150-300 kawei ka tiket.
Ha ka Bronze Membership card kaba long 1500 tyngka, ki dkhot kin ïoh ïa ka jersey bad ki jingdeng bad kin ïoh ïa ki tiket ha man la ki jingïalehkai I-league bad ka dor bai tiket kan long tang mar shiteng ne 50 persen naduh ka dor 150-200 tyngka ha man la jingïalehkai.
Ki la kyntu ruh ïa ki nongkyrshan kiba kwah ban pynrung dkhot ïalade ki la ban leit ha ka Official Club jong ka Shillong Lajong ha Instagram bad ha Facebook naduh mynta ka sngi bad ki la ruh ban wan mih sha ka ophis jong ka Club ha hotel Centre Point kaba don ha Khyndailad. Ki bor pynïaid ki kyntu bad khot wer ïa ki paidbah ba kin kyrshan biang ïa ka Clob ha ka lympung I-League kaban sdang naduh ka 22tarik mynta u bnai ha JN Complex Polo.
Lah ban kdew hangne ba ka jingïakhun ba nyngkong jong ka Shillong Lajong ha kane ka lympung I-League kan long pyrshah ïa ka Churchill Brothers ha ka por 7:00 baje janmiet ha JN Stadium Polo, Shillong.