Shwa ban ïoh ujor, dei ban pynstet ka jingai Building Permission; kyntu u Bah Titos ïa ka EC

Shillong, Jylliew, 29: Ka Liang Pyrshah jong ka Iing Dorbar jong ka KHADC ka la kyntu ïa ka Executive Committee ba thymmai ba kan pynstet ïa ka jingai Building Permission lane ka jingai jingbit ban shna Ïing ha shwa ba kan mih ka jingujor na ki paidbah.
“Ha ki khyndiat taiew la sdang ban ai ïa ka buliding permission hynrei la ïoh jingtip ba slem palat ban ai ïa kitei ki jingai jingbit. La sngewthuh ba ka daw kadei namar ba duna ki nongtrei namar kijuh ki briew kiba trei ha ka tnad Development ki donlang ruh ha ka Authority,” ong u Nongïalam ka Liang Pyrshah Bah Titos W Chyne haba maitphang ïa ka jingïatai halor ka Mangtyngka.
Shuh shuh u Nongïalam ka Liang Pyrshah u la ong , “Kumta nga kyntu ban pynstet ïa ka kam ha shwa ban mih ka jingujor ïoh ngin duh noh ïa kane ka tnad thymmai kaba ai khajna ïa ka Council.”
Haba jubab halor kane, u CEM u la ong ba ka Council kan peit ban pynbeit pynryntih ïa ka jingtreikam jong katei ka tnad khnang ba ka jingai ïa ki building permission yn lah ban ai ha ka por kaba biang.
“Ngin peit ba kito kiba pan jingbit (building permission) yn lah ban ai ha ka por kaba biang khnang ba kan ym ktah ïa ki ha kano kano ka bynta,” u la ong.
U CEM u la ai ka jingïaroh ruh ïa u Executive Member barim ka tnad Building Bye-laws, Bah Paul Lyngdoh uba la trei borbah ban pynbeit pynbiang ïa katei ka kyndon shna Ïing ha u pud u sam jong ka Council.
La pyntip ruh ba haduh mynta ka Council ka la dep ban ai haduh kumba 83 tylli ki building permission sha ki paidbah ban shna Ïing shna sem.