Shwa ban hiar sha Ait Nar, sdang ka nguh ka dem ki hynriew shnong

Khliehriat, Naitung, 14: Ki khun ki hajar jong ka Seiñ Raij Tuber, mynta ka sngi ki la sdang ïa ka nguh ka dem Blai, kata ha shwa ba kin leit ban hiar sha ka lympung ha Ait Nar ka ban sa long ha ka 17 tarik mynta u bnai naitung ha Tuber Kmaishnong, la sakhi ruh ba mynta ka sngi ki khun jong ki Seiñ Raij Shnong jong ki hynriew shnong ba kynthup ka Seiñ Raij Shnong Mutong, Mukhialong, Cham Vham, Lumshyrmit, Pynthorsale bad Ïongkaluh ki la ïakynduh lang ha shnong Lumshyrmit bad pynlong ïa ka nguh ka dem ryngkat ka shad ka mastieh.
Haba kren kum u kongsan ha katei ka jingiakynduh lang ha Lumshyrmit, u myntri ka sorkar jylla, uba dei ruh u MLA ka thaiñ, u bah Kyrmen Shylla, u la ai ka jingkhublei Behdiengkhlam ba suk ba kmen ryngkat ka jing kitbok ktrwiang ïa baroh ki khun ki hajar jong ka Seiñ Raij Tuber ba kin ioh ïa ka koit ka khiah, ka bha ka miat ba kane ka Behdiengkhlam kan beh noh sha jngai ïa ka khlam, ka pang ka shitom, khamtam ka jingiabishni pihuiñ kaba dei ka khlam kaba sniew tam ha ka imlang ka sahlang
“ Nga ai khublei ruh ïa phi ba phi la ailad shuh shuh ïa nga ban shakri ïa ki paidbah ban peit shuh shuh ïa ka bha ka miat jong ka constituency, nga kular ba katba lah la ka bor ngan wad ki lad ki lynti ban wanrah ïa ki jingdonkam kiba donkam ha kane ka thaiñ bad hapoh ka district bad nga kwah ban pynsngew ruh ba ha ka jingiaid lynti ha kaba iadei bad ka jingpynheh ïa kane ka surok ha kine ki thaiñ san shnong bad katkum ka jingtip ba nga ioh, sngewtynnad ban ong ba ka shithi (proposal) ha kaba ïadei bad kane ka surok ka la poi mynta shatei sha Delhi, nga ngeit ba da ka jingdwai, ka nguh ka dem kane ka shithi kan nym sahteng bad kan urlong lyngba ka jingdwai bad ka nguh ka dem” ong u bah Kyrmen Shylla.
Kumjuh ruh na ka liang u Deuty CEM jong ka JHADC, uba dei ruh u MDC ka thaiñ, u Ma Lasky Rymbai, u la ai ka jingkhublei Behdiengkhlam ba suk ba kmen ïa baroh ki khun ki hajar jong ka Seiñ Raij Tuber, u la pynpaw ruh ka jingsngew kmen ba ka riti ka dustur kaba naduh ki men barim ka dang neh dang sah haduh mynta bad ka nang kiew ruh na ka por sha ka por.
U Ma Lasky Rymbai, u la aiti ruh ïa ki song pisa sha ki nongialam jong kitei ki hynriew tylli ki Seiñ Raij Shnong bad ong ruh ba kane ka song pisa ka dei kaba la noh syniang lang na ka liang u bah Kyrmen Shylla, kum u MLA bad na ka liang jong u kum u MDC ba ki nongialam jong kitei ki hynriew shnong kin dup thied ïa ki sopti (jersy) ba ki khun shnong kin phong ha ka lympung ka ban long ha Ait Nar ha Tuber Kmaishnong ha ka 17 tarik.
Ha katei ka jingiakynduh lang la ïa don ryngkat lang ki nongialam shnong, paidbah ka thaiñ kynthup ki khun samla kynthei bad shynrang, ki longkmie, long kpa bad ki khynnah kiba la ialehkmen lang ha kane ka sngi sdang jong ka Behdiengkhlam.