Shukor u myntri ka tnad pynmih bording ïa ki paidbah halor ka Load Shedding

Shillong, Naitung 24 : Dang ha ka taiew ba la dep u myntri ka tnad pynmih bording ka jylla u A.T Mondal u la pynbna ba la pynjynsur ïa ka jingpynlip bording kata ha ki nongbah jong ki District sa tang ar kynta bad sha nongkyndong 5 kynta hynrei kane ka jingkren jongu ka long kumba u kren thok bad shukor ïa ki paidbah namar kat haduh mynta ka jingpynlip bording ka dang long beit da ki kynta kynta bad mynmiet lei lei tang shu poi 11.30 -12 baje la lip beit ka bor ding bad meh beit haduh ka por 5 baje mynstep.
Kane ka dei ka jingleh bym suidñiew jong ki nongpynïaid ka MeECL ïa ki paidbah bad khamtam ïa u Myntri ka tnad pynmih bording namar kiba dei peit ki leh beit katba ki mon ban pynlip bording. Lada lip bording bad tohkit pat na kiba dei peit ka jubab ban ïoh ka long ba trip ka main line bad haba ym meh katno katno ruh lada kylli biang kin jubab ba la dei ka kynta load shading. Kane ka jia man la ka miet hangne ha nongbah Shillong.
Ka jingkylli kaba mih na ki paidbah halor kane ka jinglip bor ding wat haba la dap ka dam Umiam ruh ka long hato ki high level ki la sdang ban khaïi beaiñ sa ïa bording hadien ba kim nud shuh ban leh ïa u dewiong ba la bud dien eh ka ïing bishar High Court.Lada kam dei kumta balei dang hap ban pynlip bording da ki bun bun kynta wat hadien ba la dap ka dam Umiam ruh. Nalor kata wat ka Leshka Hydel Project ruh ka la treikam mynta hynrei katta dang hap beit ban pynlip bording.