Haduh u Risaw, 2023 aipor ki nongtrei EMRIK-108 ïa ka Sorkar ban pynkiew ïa ka jingsiew tulop

Shillong, Naitung, 24: Ki nongtrei jong ka EMRI-108 ha ka Lah Sngi U Blei ki la aipor ïa ka Sorkar Jylla haduh u bnai Risaw, 2023 ba kan pynkiew noh ïa ka jingsiew tulop bad ban ai ruh ïa kiwei kiwei ki jingmyntoi, kum ka shuti, ka Medical Insurance bad ka Provident Fund (PF).
Kane ka sien kaba lai ba ki nongïalam jong ka Meghalaya EMRI Workers Union (MEMRIWU) kin pynsngew ïa ki jingdawa sha ki tyndong skhor jong ka Dr. Ampareen Lyngdoh hadien ba ka la shimti kum ka Myntri ka Koit ka Khiah jong ka Sorkar Jylla.
Ha ka jingïakren bad ki lad pathai khubor, u Adviser jong ka MEMRIWU, u Bah Roypar Kharraswai u la ong, “naduh u bnai Jylliew ba ka Sorkar Jylla ka la pynkut noh ïa ka kontrak bad ka kompeni GVK, ïa ka EMRI-108 la pynkhamti sha ka National Health Mission, Meghalaya ban pynïaid shipor naduh u Naitung haduh u Nailur, 2022 hynrei mynta la mih sa u bnai Naitung, 2023, kaba long shi snem kynthih, hynrei ka Sorkar kam pat lah satia ban shim rai eiei halor kane.”
Haba pynpaw ïa ka daw kaba pynlong ïa ka Union ban pynsngew ïa ki mat jingdawa sha ka Sorkar, u Bah Kharraswai u la ong, “naduh ba ka NHM, Meghalaya ka la shimti ban pynïaid ïa ka EMRI-108, ngim ju ïoh shuh ïa kino kino ki jingmyntoi kata, naduh ka shuti, ka Medical Insurance bad ka Provident Fund. La shi snem kynthih ngim ju ïoh shuh ïa kine ki jingmyntoi. Watla ki kam ki ïaid beit naduh ba la shimti da ka NHM hynrei ka jingsiew tulop ka long kaba rit bad nalor kata ki jingmyntoi kiba ngi dei ban ïoh ngim ju ïoh shuh.”
Haduh mynta ki don 250 ngut ki nongtrei jong ka EMRI-108 kiba trei ha baroh kawei ka Jylla ban ai jingïarap kyrkieh ïa ki paidbah haba ki ïakynduh ïa kino kino ki jingjïa kiba donkam jingïarap kyrkieh.
U Bah Kharraswai u la ïathuh ba ka Union ka la pynsngew ïa ka jingpynkiew tulop hakhmat u Managing Director jong ka NHM ha ki bnai Naiwieng, Nohprah bad Kyllalyngkot hynrei u MD u la pan por ban sa pynkiew ïa ka tulop hadien katto katne bnai.
Nalor ka jingdawa ban pynkiew ïa ka tulop, u Bah Kharraswai u la ïathuh ba ka Union ka la pynsngew ha ka Myntri ka Koit ka Khiah ha kaba ïadei bad ki jaka sah ne ki Quarter jong ki nongtrei ka EMRI-108 kiba la jot, ki bym don wat tang ka bording, kiba la jaw um ka sad bad kiba bun jingmynsaw ïa ki nongtrei.
U la ïathuh ba ka Union ka kwah ban leh ïa ki Refresher Traning ïa ki nongtrei kiba dang wan thymmai kumba ju leh mynshwa manla ka hynriew bnai hynrei naduh ba la shimti da ka NHM kane ka jingai jinghikai kam ju don shuh mynta la jan shi snem kynthih.
Haba kylli, u Bah Kharraswai u la ong, “ngi kwah ïa ka Sorkar ba kan shimti hi noh ïa ka EMRI-108 namarba ka Sorkar ka la ai jingkyrshan pisa haduh 90 percent. Mynta la 11 bnai naduh ba ka NHM ka la pynïaid ki kam ki ïaid beit bad ngi shem ruh ba kam don jingeh eiei ia ka Sorkar ba kan pynïaid hi ïa kane ka kam.”
“Watla ka Myntri ka Koit ka Khiah ka la pynpaw ba ka Sorkar ka shem jingeh ban leh ïa kita, hynrei ngi la ïakren ruh lada ngin shu long tang kum ki nongtrei bashipor mynta la 15 snem kynthih ka shem jingeh shibun ban trei ïa ka kam nalor ba ka jingsiew tulop ka long kaba rit. Ngi kyrpad ïa ka Sorkar ba la kumno kumno ka dei ban pynjanai noh ïa kane ka kam namar kiba bun na ki nongtrei jong ngi ki shem jingeh.
Ka Myntri ka Koit ka Khiah ha ka jingïakren bad ki lad pathai khubor ka la ïathuh ba kum ka Sorkar kan sa ïakren bad ka NHM ha kaba ïadei bad ki jingdawa ba ka MEMRIWU namarba ka Sorkar hi kan ym lah ban shim ïa kano kano ka rai na ka daw ba ki nongtrei ka EMRI-108 ki dei ki nongtrei jong ka Kompeni ym ki nongtrei sorkar.
Ka la ïathuh ruh ba kan ïakynduh biang ïa ki nongïalam ka MEMRIWU ha u bnai Risaw, 2023 ban ïakren halor ki jingtyrwa bad kumjuh ruh ban ïada ïa ka kam jong ki nongtrei ynda la shimti thymmai da kiwei pat ki kompeni ïa ka EMRI-108.