Shongshit ka lympung ïalehkai kynjatbol ba shi sngi jong ka jingdap 13 snem ka shnong Nongbah-Marshilong

Mawkyrwat, Risaw 17: Kum ka dak jong ka jingrakhe ha ka jingdap 13 snem jong ka shnong Nongbah-Marshilong, na ka liang ka Dorbar Shnong Nongbah-Marshilong lyngba ka Orgnising Committee ka la pynlong ïa ka lympung ïalehkai kynjatbol kaba la tip kum ka Charitable Football Friendly Match ha madan jong ka Tyllilang Secondary School jong ka Shnong Nongbah-Marshilong, South West Khasi Hills District.
Ka jingïalehkai ha kane ka sngi ka dei hapdeng ka Seng Kynthei Shnong Nongbah-Marshilong ka la shah rem noh da 2 – 1 kol ha ka Jingïaseng Kynthei Nongbah-Marshilong Presbyterian Church kaba dei ha ka jingïalehkai jong ki kynthei. Ha ka jingïalehkai jong ki rangbah pat ki Rangbah jong ka Shnong Nongbah-Marshilong ki la jop da 4 – 3 kl ha ka Tie Breaker pyrshah ïa ki Rangbah na ka Balang Presbyterian Nongbah-Marshilong.
Ki nongkren ha kane ka sngi ki la ai ka jingkitbok kitrwiang na ka bynta ka shnong Nongbah-Marshilong namar lyngba ka jingkyndoh jong ki ïa u mawmer jong ka jingdap 13 snem ka dei lyngba ka jingïatreilang bad jingïalong shi tylli. Ki la kyntu ruh na ka bynta ki nongïalam shnong ba kin nang trei shitom shuh shuh ban wanrah ïa ka jingbha jingmiat hapoh ka shnong ka thaw bad khamtam eh ban rad ryngdhong na ki jingsniew kiba la wan jia ha kine ki sngi ba mynta.
Na ka bynta ki jingïalehkai kynjatbol pat, ki la ai ka jingkyrkhu kyrdoh ïa ki naduh ki Longkmie bad ki longkpa jong ka shnong bad kumjuh ruh jong ka Balang ba haba ki ïalehkai kin ïaleh da ka mynsiem jong ka jingïaieit bad kham kyrpang ba ka dei ka jinglehkmen kin da ïalehda ka jingmynsiem jong ka jingïatylli namar da ka jingïatylli kan wanrah ka jingjop ha ki liang baroh.
Ïa kane ka lympung ïalehkai kynjatbol la wan ban plie pyrda da u bah G.D. Kharwanlang, Superintendent of Police, South West Khasi Hills District kum u kongsan uba la shim ruh ïa ka bynta ban pynher ïa ka lama, u Dr. W.L. Narry, Medical Officer, Civil Hospital Mawkyrwat kum u symbud kongsan ryngkat ka jingïadonlang u bah Lostar Lyngdoh, Myntri Shnong Nongbah-Marshilong bad ha kajuh ka sngi la wan ban pynhap pyrda noh da u bah Renikton Lyngdoh Tongkhar, MLA ka Mawkyrwat Constituency kum u kongsan bad u bah Elevenson Wanniang kum u symbud kongsan ryngkat ka jingïadonlang ki ‘riew rangbah, ki samla, ki hep kiba rit jong ka Shnong Nongbah-Marshilong lem bad ki nongshah khot sngewbha.
Ïa ka jingïalang la pynïaid da u bah S. Lyngkhoi, Secretary jong ka shnong Nongbah-Marshilong, ka jingkren pdiang na ka kong Anita Lyngdoh, ka jingrwai kyrpang na ka Village Organization jong ka Shnong Nongbah-Marshilong bad ka jingkren khublei na ka kong Banteilang Lyngkhoi.