Nongstoiñ, Risaw 19: Ka West Khasi Hills district haduh mynta kam pat don satia la ka jong ka ïing ban buh tyngkai bad pynneh pynsah ïa ki kot pule ba bun jait kiba la thoh da ki naduh ki por ba mynshuwa ba ki samla pule kin leit ban pule. Ïa kane la lap da ki nongïalam ka FKJGP Nongstoiñ circle ha ka jingleit jurip jong ki ha kane ka sngi palei.
U samla Flymingstone Tyrsa Education secretary ka seng, haba kren ha ki lad pathai khubor hadien ka jingud jingnam jong ki samla pule na ka por sha ka por, ba ki shem jingeh bha ban leit pule ïa ki kot ha katei ka library, namar ka jingbym biang ki kamra bad ki jaka shong. Kumta ka seng ha kane ka sngi palei ki la leit ban jurip ban lap ïa ka jingshisha.
Utei u nongïalam ka seng u la ong ruh ba ha ka jingïakren bad ka nongpynïaid jong katei ka library, ka la kubur ba ki don shibun ki jingduna bad ka la ong ruh ba kum ka nongpynïaid, ka la dep phah da ka jingthoh sha ka sorkar ba kan pynbiang ïa ki almari buh kot bad kiwei kiwei hynrei na ka liang ka sorkar kam pat leh ei ei haduh mynta.
Nalor kata katei ka nongpynïaid ka la pynpaw ruh ha ki nongïalam ka seng ba ka ïing kaba dei ka district library kaba don mynta, kam dei satia kaba la shna na ka bynta ban pynlong library, hynrei ka dei ka jaka sah barim jong u Deputy Commissioner.
Ha kaba ïadei bad ka jingbym biang jong katei ka library, na ka liang ki nongïalam ka FKJGP ki la pynpaw ïa ka jingsngewkhia halor ka jingleh meinah jong ka sorkar ïa ka West Khasi Hills ym tang ïa ka district library, hynrei naduh ki madan ïalehkai, haduh ki surok, ki lynti syngkieng, ka pule puthi bad kiwei kiwei.
Na ka liang ka seng ka dawa jur ïa ka sorkar ba ka dei ban pynïoh noh da ka library auditorium ha Nongstoiñ bad ban shna da ka ophis kaba bit ba biang, na ka bynta ba ki samla kiba smat ban leit pule kot bad ban wad jingtip bniah shaphang kiei kiei kiba la thoh naduh ki por ba mynshuwa ha ki kot ba la buh tyngkai ha katei ka library kin suk ban pule.
