Nongstoiñ, Risaw 19: Ka Khasi Students Union Mawshynrut Circle hadien ka jingujor na ki kmie ki kpa jong ki khynnah skul jong ka Government L.P Skul Pyndengkirit, ka la leit ban jurip ïa katei ka skul bad lap ba ka long kaba isangsot shisha bad ym I ïahap shuh ban ong ba ka dei ka skul, pynban ka la syriem kum ka sem masi sem blang.
Ka seng hapoh ka jingïalam jong u samla Sarphosly Rongrin Education Secretary, samla Stelius Rongrin bad la synran lang da u samla Ulysis Ryntong General Secretary bad kiwei kiwei, ka la leit dalade ban jurip ïa katei ka skul bad ka la lap ruh ïa shibun ki jingduna kiba ïadei bad katei ka skul.
Ka jingduna ka long naduh ki ben shong bad ki miej thoh ba ki khynnah ki la hap ban shong ha madan ha ka por shim klas kaba la I sangsot shisha. Nalor kata la lap ïa ka jingbym ïoh ïa ka midday meal naduh u snem 2017 haduh mynta u snem 2023. Ka jingbym ïoh jingsiew ki nongshet ha katei ka skul kaba la pynlyngngoh shisha ïa ka seng.
Shuh shuh la lap ruh ïa ka jingbym biang ka ïing skul, ka ïing shet ja, ka um bad ki paiñkhana. Haba ïakren bad ki nonghikai ruh ki la ïathuh ruh ba wat ïa ki jingdonkam jong ki khynnah skul la hap ban pynbiang da ki Nonghikai.
Halor katei ka bynta ka seng KSU Mawshynrut Circle lyngba ka Education Call ha ka 18 tarik Risaw 2023, ka la leit ban ïakynduh ïa I Sub-Divisional School Education Office West Khasi Hills District, ban pynsngew halor katei ka bynta, ha kaba na ka liang ka jong I, I la kular ban buddien ïa ka kam khnang ba ki khynnah kin nym duh noh ïa ka hok jong ki.
Ka seng ka la kyntu ruh ïa ki nongpynïaid ïa ka skul ba kin pynïaid bad shakri hok la ka kamram, khnang ba kan nym don ka jingduhnong ïano ïano ruh.
