Khliehriat, Risaw 19: Ka Khasi Students Union Wapung Unit ka pynbna ba kan sa pyn long ïa ka jingsam khusnam kaba ju pynlong man la u snem ka 4th U Woh Tep Kyndiat Memoral Acadamic Award 2023, ïa kane ka prokram ka seng kan pynlong ha ka 21 tarik mynta u bnai risaw ha ïing shnong (Community Hall) ha Wapung Shnong bad ka prokram kan sdang ha ka por 10 baje mynstep.
Ka jingsam ïa ki khusnam ka long na ka bynta kito ki samla kiba la pass bha ha ki exam SSLC, HSSLC,Graduate, Post Graduate, ki CBSE examination jong une u snam 2023.
Ka seng ka kyntu ïa kito ki samla pule kiba la dep ban pynpoi ïa ki marksheet jong ki ba kin sngewbha ban don khnang ha katei ka sngi bad ka seng ka la kyrpad ruh ïa ki kmie ki kpa jong ki samla pule ba kin sngewbha ban wan ban ïa don ryngkat lang ha katei ka sngi ba sam ïa ki khusnam sha ki khun jong ki.
Kane ka jing ai khunsam jong ka seng kaba la ïaid mynta la lai snem bad kynjoh sha ki saw tylli ki snem ka dei namar ba ka seng ka sngew dei ban kynmaw burom ïa uwei na ki khlawait ka ri uba la ieng rangbah bad ialeh na ka bynta ka ri bad ka jaitbynriew uba la tip kyrteng bad khot ieid ruh da u Woh Tep Kyndiat, ha kaba wat ka Seiñ Raij Tuber ruh ka la dep ban tei nam ïa u da u Mot ba heh ba itynnad ha shnong Tuber Kmaishnong kum ka dak ka jing sah jingkynmaw pateng la pateng ïa une u khlawait na ri lum Jaiñtia, ki nong jngohkai pyrthei kiba na jan bad na jngai ruh ki ju wan ban peitkai bad kiew shalor une u mot, kane ka long katkum u kyrwoh ba la phah da u Publicity Secretary KSU Wapung Unit, u samla Luckystar Rymbai.
