Shillong, Nailar 27 : Ka lympung ïalehkai karate ha ka jylla kaba tip kum ka 30th Inter School bad 12th Inter College Karate Tournament, kaba la pynbit pynbiang da ka All Meghalaya Karate-Do Association, ka la kut noh ha kane ka sngi Saitjai ha ka jingïalehkai kaba itynnad kaba logn ha Sports Authority of India campus, NEHU.
Ha kane ka lympung ïa ka nam lahduh la ïoh ban bat biang da ka St Anthony’s Higher Secondary School ha ka liang ki khynnah shynrang katba ka Sacred Heart Girls Higher Secondary School ka la khur ïa ka nam lahduh ha ka liang ki khynnah kynthei. Ha kajuh ka por ka Shillong College ka la ïoh ban khur ïa ka nam lahduh ha ka liang ki College.
Baroh ki la don haduh 609 ngut ki nongïalehkai karate kiba wan ban shim bynta mynta u snem, kaba pyni ïaka jingkiew kumba 100 ngut ha ka jingïalehkai jong u snem 2023. Ïa ki nongïashim bynta la jied na ki 95 tylli ki skul bapher bapher bad hynriew tylli ki college hapoh ka jylla Meghalaya.
Ki kynhun ba wan ba ar ki long ka Sunrays Secondary School (ha ka liang ki khynnah shynrang), ka Synod Higher Secondary School (kynthei) bad ka St Anthony’s College (na ka thup jong ki college).
Ka kyrdan jong ka jingïakop ka long kaba heh bha bad la ïohi ïa ki katto katne ki nongïalehkai karate kiba pyni ïa ka jingtbit jong ki. Don ruh ki nongïalehkai karate kiba kham tbit ki dang ïai bteng ban tyngshain, bad kiba bun na ki mynta ki don ha ka kyrdan jong ki college hadien ba ki la kiew na ki kyrdan ba rit ha ki snem ba la leit noh.
Related Posts
Ka jingïalehkai kaba itynnad bha na ka Sacred Heart Girls, ka Sunrays bad ka Synod HSS, watla kim ju kham paw ha ka thup jong ki skul karate ka pynpaw ïa ka jingnang kiew katei ka jingïalehkai ha kane ka jylla da ka jingtrei shitom jong ki samla karate, kumjuh ruh ki coach, ki nonghikai bad ki kmie ki kpa jong ki. .
La sam ruh ïa ki khusnam Individual Best Karateka ha ka jingïalang sam khusnam ha ka sngi ba khatduh jong kane ka jingïalehkai kaba lai sngi.
Ïa kine ki khusnam la sam sha u Trevor Ryntathiang na ka Sevenset HSS (Junior Boys), u Nathaniel J Thongni na ka All Saints Diocesan HSS (senior boys), ka Naomi Yuvinie Sylliang na ka Sacred Heart Girls HSS (junior girls), ka Dominica P Kharbani na ka Sacred Heart Girls HSS (senior girls).
Katba u Ïalamphang Kharkongor jong ka Shillong College u la ïoh na ka thup jong ki College ha ka liang ki shynrang katba ka Durka Padit jong ka Shillong College ka la ïoh ïa ka khusnam ha ka liang ki samla kynthei.
La donlang ruh ha kane ka sngi naduh u CT Shyamdeo, Deputy Director jong ka SAI Centre, Shillong kum u Kongsan ban pynhap pyrda ïa kane ka lympung.
Ïa kane ka lympung la wan ban plie pyrda da ka Kong Isawanda Laloo IAS kaba dei ka Secretary ka tnad Sports & Youth Affairs. Kiwei pat ki riew pawkhmat kiba la sakhi ïa kane ka jingïalehkai ki kynthup ïa u Working President ka Meghalaya State Olympic Association u Bah John F Kharshiing bad u General Secretary ka MSOA u Shri Finely L Pariat, nalor kiwei kiwei.