Shillong, Jylliew 23 : Ka Lympung ïalehkai jong ka 11th Meghalaya Jeet Kune Do State Level Championship 2026 kaba long ha ka 19 bad 20 tarik Jylliew 2026 ha Madanrting Indoor Sports Hall, Madanrting, Shillong ka la long kaba shongshit bha. Ïa kane ka lympung la pynlong da ka Meghalaya Jeet Kune Do Association (MJKA), kaba la khring ïa kumba 100 ngut ki nongïashim bynta na ki distrik bapher bapher jong ka Meghalaya. Ki nongïalehkai ki la pyni ïa la ka sap, ka jinglong ryntih, ka jingïalehkai hok bad ka mynsiem jingïakhun ha kine ki ar sngi.
Ha kane ka jingïakob la donlang u D. Ranee, uba long u nong seng jong ka MJKA, bad ka Bajoplin Kharmudai, Secretary jong ka seng, ryngkat bad ki dkhot ka executive committee, ki technical official, ki coach, ki referee, ki volunteer bad ki nongkyrshan. Ha ka jingïalang plie pyrda, u kongsan u dei u Deelip Roy, President jong ka United Jeet Kune Do Federation of India (UJKDFI).
Ha ka jingkren jong u, u la ai jingïaroh ïa ka MJKA halor ki jingtrei shitom jong ka ban kyntiew ïa ka Jeet Kune Do ha Meghalaya bad u la ai mynsiem ïa ki samla nongïalehkai ban trei shitom bad bud ïa ka jinglong ryntih bad jingïaineh. Ha ka jingïalang pynhap pyrda, la wan ban don bynta da u Pilotius Lamare, Officer-in-Charge ka Madanrting Police Station, ryngkat bad ka kynhun jong u.
Ka Championship ka la kynthup ïa bun jait ki kyrdan bad ki rta jingïakob, kaba la ai lad ïa ki nongïalehkai ban pyni ïa la ka sap bad jingïakhun. Ha kaba kut jong ka lympung, la sam ïa ki medal, certificate bad trophy sha ki nongjop bad ki nongïalehkai kiba kynsai.
Ka MJKA ka la pynbna ruh ba ki nongïalehkai kiba la ïoh medal ha ka Championship kin mihkhmat ïa ka Meghalaya ha ka National Jeet Kune Do Championship 2026 kaban long ha Cotton University, Guwahati naduh ka 26 haduh ka 28 tarik Jylliew 2026.
