Shongshit ka Impasto Grand Finale ki samla pule ka ICFAI University

Shillong, Risaw, 04: Ka Impasto Grand Finale jong ka ICFAI University Meghalaya kaba la long ha ka 1 tarik u Risaw, 2022 ka la kut noh hapdeng ka jingshongshit da ka jingïashim bynta jong ki samla pule kane ka skulbah ha ki rynsan ïakop bapher bapher kaba la long ha Anton Hall, Laitumkhrah, Shillong.
Ha kane ka sngi, ki samla pule shynrang bad kynthei ki la pyni ïa ki sap ki phong ha ka rwai ka siaw, ha ka shad ka kmen bad ha ka rynsan ïakop rang bad thei bhabriew ha ryngkat ka jingsakhi lang jong ki nonghikai bad ka Principal ka Dr. Alicia Gatphoh.
Ka Dr. Gatphoh haba kren ha kane ka sngi ka la kyntu ïa ki samla pule ba kin pyndonkam hok ïa la ka sap ka phong kaba ki don nalor ka jingpule kaba ki dang dei ban pyndep.