Nongstoiñ, Nohprah, 18: Ka Ong Ï Maiñ Socio Cultural Welfare Society Pyndengrei, ryngkat ka jingïasnohktilang bad ka ophis jong ka Department of Arts and Culture jong ka sorkar Meghalaya, lyngba ka Rynsan Khyllie Saptynrai Ri Lyngngam, ha ka sngi balang ka la ïoh ban pynlong ïa ka Tamasa kaba la tip kum ka Ambiaw.
La ong ba katei ka Tamasa ka dei shi bynta ban kynsiew thiah ne kyntu ïa ka thaiñ Ri Lyngngam, ba kin pynim biang bad ban ri kin sumar ïa la ka jinglong tynrai naduh ka riam ka beit, ka bam ka dih, ka kheiñ kur kheiñ kha, ka shad tynrai lehniam leh rukom bad kiwei kiwei ha kaba ha katei ka Tamasa la don ruh shibun kiba wan ïashimbynta shit rhem naduh ki samla haduh ki rangbah kiba la pyni ïa la ki sap ki phong bapher bapher.
Ha katei ka Tamasa u bah Ïoannis Hahshah Lamphang ka KSU Langkynma na ka thaiñ Borsohra, u la long kum u kongsan ryngkat ka jingïadonlang u bah Witting Mawsor MLA barim ka Mawchynrut konstitwensi kum u symbud kongsan, ka kong Ibanpdianglin Kharwanlang, District Librarian, Department of Arts and Culture WKHD bad kiwei kiwei.
U nongaiktien ka Ong Ï Maiñ kata u bah Jose Thongni u la ïathuh ba namar ka dang dei ka jingsdang kaba nyngkong, kumta ka kynhun ka la shem jingeh hynrei da ka jingïadonlang u R.G Momin MLA ka Rambrai, bah Methodius Dkhar MLA ka Mawchynrut, bah Banrap Marshillong & Rympei ba ïar CLF, Bah Gardinal Sohshang, kong Barishisha Kharbani, JE PWD bad kiwei kiwei katei ka Tamasa ka la long kaba jop.
Ha katei ka sngi ka samla Loma Breeze Rashir ka la ïoh ban rah ïa ka namjop kum ka Miss Mandesar bad u samla Firstbornson Rongrin u la rah ïa ka namjop kum u Mr Mandesar 2024.
La don ruh ki jingbam tynrai bad nalor kitei la buh lang ruh ka jingshon pynrung Adhaar Card, ka jingshon Smart Card, ka jingpeit nongpang da ka koit ka khiah bad kiwei kiwei ki jingdonkam ïa kaba la pynbit pynbiang na ka bynta u paidbah ka thaiñ Ri Lyngngam.
