Shillong, Nohprah, 18: Ka Khasi Students’ Union (KSU) ha ka sngi Balang ka la rakhe kynmaw burom ïa ka lyngkhuh sngi ïap kaba 84 snem jong u Myllung Soso Tham, uba la noh synñiang shikatdei eh ha ka thoh ka tar khamtam ha kaba thoh ïa kiba bun tylli ki poitri ban kyrsiew thiah ïa ka jaidbynriew Khasi.
Ki dkhot ka seng na ki Unit bad ki Circle ha kane ka sngi, ki la leit buh syntiew ha u durmot jong u Myllung Soso Tham uba la tei ha phyllaw jong ka skulbah North Eastern Hill University (NEHU), Shillong ba la lamkhmat da u President u samla Lambokstar Marngar bad u General Secretary u samla Donald V. Thabah.
Ha kane ka jingïalang, la pyllait paidbah ruh ïa ka Stamp kaba la shon ha ka kyrteng jong u Myllung Soso Tham kaba la ithuh bad pynmih da ka Ministry of Communication lyngba ka Department of Post, ka Sorkar India kum ka dak ka jingainam ïa ka kyrteng jong u Myllung Soso Tham da ka Senior Superintendent of Post Offices, Meghalaya Division ka Anjali Verma bad u President ka KSU.
