Nongstoiñ, Risaw, 28: Ka skul Church of God Secondary School Upper New Nongstoiñ, mynta ka sngi ka 28 tarik u Risaw ka la ïoh ban pynkut bad pynhap pyrda noh ïa ka taïew leh kmen jong ki khynnah skul (School Week) kaba la neh haduh shi taïew lynter.
Ïa katei ka taïew leh kmen jong katei ka skul, la wan ban pynhap pyrda noh da ka Kong Lata Syiemlieh kaba dei ka District School Education Officer kum ka kongsan, ha ryngkat ka jingïadonlang ruh u bah Shanbor Lyngdoh Secretary ka DEC kum u symbud kongsan.
Ha kane ka sngi na ka liang jong ka Kongsan, ka la ïoh ruh ban sam ïa ki khusnam sha ki nongjop ha ki jingïakop bapher bapher ba la pynlong da ka skul ha kine ki shi taïew lynter.
Na ka liang I kongsan I la kitbok kit rwiang sha baroh ki khynnah ba kin nang leh bha ym tang ha ki kam ïalehkai na ka bynta ka koit ka khiah ha ka bor met bad bor jabieng. Hynrei, kham kongsan eh ban pynleit jingmut bad minot bha ha ki lynnong kot na ka bynta ka lawei ba phyrnai.
Nalor ki kongsan bad kiba shah khot sngewbha ha kane ka sngi la ïadonlang ruh u Headmaster katei ka skul u Babu Badonbok Paliar, ki nonghikai, ki khynnah skul bad kiwei kiwei.
