Nongstoiñ, Risaw, 28: Ki paidbah nongshong shnong kiba don ha khappud bad ka Assam ba kynthup ïa ka Sildubi, Malangkona, Joypur, Salbari, Nonghawei, Malangkhasi, Huhuapara haduh Langdongdai, ki la angnud la slem bah ban don noh ka ktem pulit ba pura ha Malangkona.
Katto katne ki rangbah na katei ka thaiñ kiba dei ruh ki nongïalam paidbah ba kynthup ïa u Bah Elwin R.Marak, Bah Debendro Sangma bad u Bah H.J.Marak haba ïakren bad u nongthoh khubor, ki la ïathuh ba ki paidbah nongshong shnong jong katei ka thaiñ ki la thrang dik dik ban ïoh da ka ktem pulit ba pura khnang ba kin peit lem ïa ka shongsuk shongsaiñ ha ka thaiñ.
Kitei ki rangbah ki la ïathuh ba ha ki snem ba la dep ha ka por ba u Bah S.Kharlyngdoh u dang long kum u Deputy Commissioner bad u Bah S.Nongtnger u dang long u Superintendent of Police jong ka West Khasi Hills, ki la leit ban ïakynduh ban ïakren halor katei ka mat ba donkam.
La ong ba kitei ki heh ka District ki la ong ban buh ïa ka ktem pulit ha katei ka jaka, ka shong ha ka sorkar jylla namar ki bor pynïaid District ki la dep phah ïa ki jingai jingmut sha ka sorkar ba kan leh ïa kata.
Hynrei ka long ruh kaba lyngngoh ba ha u 2018 la pynbna Police out post, pynban ka jingdon briew imat hapoh 5 ngut ei ei. Katba don ki jingialang, bunsien la iohi beit tang na ki heh pulit ka Riangdo. Kaba mut ba naduh katei ka por haduh mynta, ym pat ïohi dak ei ei ba ka sorkar kan leh ïa kata na ka bynta ban wanrah ïa ka shongsuk shongsaiñ.
Ki la pynkynmaw ba ka jingwan thombor jong ki pulit Assam ïa ki paidbah ha ka shnong Huhuapara ha kine ki snem ba la dep, ka dei namar ba ha katei ka por ym pat don ktem pulit satia ha Malangkona.
Ki la ïathuh ba ïa ka jaka na ka bynta ban buh ïa ka ktem pulit, ki nongshong shnong ki la dep pynkhreh lypa ha Sildubi bad lada ka sorkar ka don ka jingkit-khlieh na ka bynta ka shongsuk shongsaiñ ha katei ka thaiñ, ka la dei ban pynurlong noh kloi katba lah na ka bynta ka jing-myntoi ki paidbah ka thaiñ.
