Shongkun ka lehniam Behdeinkhlam ha lympung Ait Nar ha Tuber Kmaishnong

Khliehriat, Naitung 17 : Ia ka jingleh niam Behdeinkhlam kaba ju pynlong man la u snem la pynkut mynta ka sngi ha ka rukom kaba i shong kun ha ka lympung ha ka Bir Ait Nar ha shnong Tuber Kmaishnong ha kaba u Symbud Myntri rangbah jong ka jylla, u bah Sñiawbhalang Dhar u la long kum u kongsan bad u la ai sngewbha ruh T 1lak tyngka ïa ka Seiñ Raij Tuber, ha kane ka lympung la ïa don ryngkat lang ruh u myntri ka sorkar jylla, uba dei u MLA ka thaiñ, u bah Kyrmen Shylla, u MLA ba rim, u bah Justine Dkhar, u deputy Commissioner ka East Jaiñtia Hills District, u Abhilash Baranwal, IAS bad kiwei kiwei ki heh sorkar lem bad ki nongialam jong ka Seiñ Raij Tuber.
Ha kane ka lympung la wan poi haduh 65 tylli ki rot lane ki rong ki rup kiba la wanrah na ki Seiñ Raij Shnong bapher bapher, kine ki rot ba bun rong ha ryngkat ka sur ka ksing, ki jingput tangmuri bad bukur ki la nang pyn phuh pyn phieng shuh shuh ïa ka lympung, ha kajuh ka por ki la don ruh ki jingthoh bapher bapher kiba kit jingmut ha ki rot kiba thoh shaphang kumno ban sumar ïa ka mariang, kumno ban kiar na ki drok, kumjuh ruh ka jingsniew bapher bapher kum ka jingbat bor bad kiwei kiwei.
U bah Sñiawbhalang Dhar, haba kren kum u kongsan, u la ai ka jingkhublei Behdiengkhlam ïa baroh ki paidbah jong ka Seiñ Raij Tuber ba kin nang ioh ka koit ka khiah, ka bha ka miat, ba kin nang kiew ha ka ioh ka kot, ha ka rep ka riang bad ong ruh ba kane ka jingleh niam Behdiengkhlam ka dei ka burom ïa ka ri Jaiñtia.
Haba kren shaphang ki jingthoh ba la thoh ha ki rot ne ki rong, u la ong ba kine ki jingthoh kiba la thoh ha ki rot lane ki rong ki pynkyndit bynriew shuh shuh ïa ki nongmihkhmat ba kumno ban nang trei kham bha shuh shuh wanrah ïa ka bha ka miat ha ka imlang ka sahlang.
U la ai burom bad jingiaroh ïa u bah Kyrmen Shylla bad ong ba u dei u bym ju shong kli kti hynrei uba ju pyrkhat na ka por sha ka por halor kumno ban wanrah ïa ka roi ka par ha ka thaiñ bad hapoh ka district bad kumno ban wad ki lad kumno ban shna ïa ka surok ka ban leit sha Khloo Blai bad ban pynbha shuh shuh ïa ka Galary ne ka rynsan ha Ait Nar, u kongsan u la ong shuh shuh ruh ba kawei kaba kham kyrpang ka dei ruh ka memorandum kaba ka Seiñ Raij Tuber ka la buh hakhmat jong u kum u kongsan ban iarap pisa ïa ka Seiñ Raij ha kaba iadei bad ban pynbha shuh shuh ïa kane ka jaka ba leh niam ha Ait Nar bad halor kane u la kular ba sa iakren.
Khyndiat shaphang ka leh niam Behdeiñkhlam, kane ka leh niam Behdiengkhlam jong ka Seiñ Raij Tuber ka dei ka Behdeiñkhlam kaba heh duh ha Ri Lum Jaiñtia kaba ju pynlong shisien shi snem kaba don ka jingngeit ba kane ka leh niam ka dei ka ban beh noh ïa ka khlam, ka pang ka shitom, ka ju don ruh ka jingïatan Bhang hapdeng ka phang wah bad ka phang Neng ha kaba mynta u snem ka phang Neng ka la jop ïa ka phang Wah bad kane ka pyni ïa ka dak kaba bha, ha ka rep ka riang, ka koit ka khiah, ha ka kamai kajih.
La sakhi lang ruh ïa kane ka sngi pynkut ïa ka Behdeiñkhlam bad noh rong jong ka Raij Tuber da u Doloi Elaka Jowai, u Doloi Puramon Kynjing, ki MDC na Jaiñtia Hills Autonomous District Council bad kiwei kiwei ki ba la shah khot sngewbha.
Ha kane ka sngi, ka Seiñ Raij Tuber ka la aiti ruh ïa ka dorkhas (Memorandum) ha u bah Sniawbhalang Dhar ha kaba iadei bad ka jingdonkam ban pynbha ïa kane ka jaka lehniam ha Aitnar bad ruh ban pynbha ïa ki lynti, synkieng bad na ka liang jong u Kongsan ruh u la kular ban ïarap katba u lah.