Nongpoh, K’lyngkot, 05: Kum ka jinglehkmen Christmas bad ka jinglehkmen ban pdiang ïa u snem ba thymmai, ki jaid bynriew Garo ha ka thaiñ Byrnihat lyngba ka A’chik Cultural Club, Killing, ki la pynlong ïa ka jingïakop rwai ne shad ba la tip kum ka ‘3rd Song Kristan’ ha sngi Saitjaiñ ha ka shnoing Barakilling ha kaba la wan ban shim bynta da ki khun samla Garo na ki shnong bapher bapher ba hap ha ka thaiñ Byrnihat ha Ri Bhoi.
Kane ka dei ka jinglehkmen ba la ju pynlong shisien shi snem da ki paid Garo kaba long kum ka jinglehkmen ïa ka Christmas bad ruh ban pdiang ïa u snem thymmai bad ha kane ka jinglehkmen ki khun samla Garo na ki shnong bapher bapher ki hap ban ïa kop ban shad bad ban rwai Christmas ha ka ktien Garo lyngba ki riam tynrai bad ka jingïatied ïa ki bom, kaba long ka jingpyni ba ki Garo ruh ki long kiba riewsphah ha ka shad ne rwai tynrai.
Ïa kane ka jinglehkmen la wan ban shim bynta da u MLA ka Jirang u Bah Sosthnes Sohtun kum u kongsan bad u Bah Sunmoon Marak kum u symbut kongsan bad la sakhi lang ruh da ka jingdon lang ki heh nongïalam Garo bad ki paid Garo kiba la shim bynta ha kane ka jinglehkmen ba ki la khot ka Songkristan.
Lyngba kane ka lympung, kam dei satia ba ki khun samla Garo ki pyni ïa kata ka jinglehkmen Christmas ne snem thymmai, hynrei ki pyni ruh ïa ka jingriewspah ki paidbah Garo ha ka riam tynrai bad ka jingrwai tynrai.
Da ka jingshim bynta shitrhem, ha kane ka Songkristan, ka kynhun ki samla na Umpher, 12mer ki la ïoh rah ïa ka nam jop, bud sa ka kynhun ki samla Nongspung A ha ka nam kaba ar bad ka kynhun ki samla na Ampher, Assam ha ka kyrdan kaba lai.
U MLA ka Jirang Constituency u Bah Sohthes Sohtun bad u Bah Sunmoon Marak kum ki kongsan jong kane ka lympung, ki la ai jingïaroh ïa ki paidbah Garo kiba la pynlong kum kane ka jingïalum lang ban leh kmen ïa ka Christmas bad snem thymmai bad ha kajuh ka por ruh ki kyrpad ba ki dei ban don ïa ka mynsiem jong ka jingïatylli na ka bynta ban wan rah ïa ka shongsuk shongsaiñ ban dang bit dang biang ha ka imlang ka sahlang.
