Shong kyllaiñ myngngor ki nongtrei Mid day Meal ha ophis ka SDSEO Khliehriat ba khlem ioh jingsniew la hynriew bnai

Khliehriat risaw 5: Ki nongtrei ba ju shet ja sngi ïa ki khynnah ha skul kiba ha East Jaiñtia Hills District, kiba don lang hapoh ka shatri jong ka All Jaiñtia Mid Day Meal Workers Union, mynta ka sngi ki la ïa mih bad leit sha ophis jong ka SDSEO ha Khliehriat bad ki la ïakren ruh bad kat SDSEO halor ka jingbym ioh jingsniew jong ki mynta la don hynriew bnai, kitei ki nongtrei ki la ïa shong kyllaiñ myngngor ruh hakhmat ophis ka SDSEO da kaba rah ïa ki placard, ka baner jong ka Mid Day Meal jong ka PM Pohshan.
“ Ban shet man la ka sngi ïa ki khynnah ha skul, kam dei ka kam leh isynei-Siew noh ïa ka pisa bainong (honorarium) ïa ngi lane sangeh noh ïa kane ka PM Pohshan ha Meghalaya” kine ki dei ki jingthoh ba la thoh ha ki placard ba ki la rah bad ki la ieng hakhmat ka ophis jong ka SDSEO ha Khliehriat, kitei ki nong shet ja sngi ha ki skul, ki la pynpaw ka jingsngew khia halor ka jingbym siew ka sorkar ïa ka bainong ïa ki mynta la don hynriew bnai kaba ju siew T60 tyngka shi sngi kum ka honorarium, ki la ong ba kane ka jingleh ka sorkar ka pynduh mynsiem ïa ki ban trei ïa ka kam bad ka la buh jingeh ruh ïa ki ha ka ban pyndap lem ha iïng ha sem, namar watla ka dei ka jingsiew kaba rit ruh hynrei ka ïarap ïa ki ban pyndap lem ha iïng ha sem.
Na ka liang ka SDSEO East Jaiñtia Hills District, ka kong P.Dkhar, ka la ong ba “Ha ka jingiadei bad kane ka jingeh jong ki nongshet ja sngi ha ki sku, nga sngew khia halor kane ka jingwan jong ki sha kane ka ophis, hynrei na ka liang ka ophis hi ngi la dep thoh bad pyn sngew sha ki bor ba halor ba kin pynstet ïa kane ka kam bad ban leh eiei halor kane bad ngin nang pynsngew sha ki bor ba halor ban pyllait noh ïa kane ka honorarium ka jong ki, bapli ki la shem jingeh namar naduh u bnai lber ba ka sorkar ka pyllait ïa ka jingsniew honorarium bad hadien kane ki khlem ioh jingsiew shuh hynrei pat ki hap ban shet ja man la ka sngi ïa ki khynnah ha sul”
Haba kren sha ki pathai khubor, i kong L.Bareh ba na Khliehriat i la ong ba na ka liang ki nongtrei Mid Day Meal ki kyntu ia ka sorkar ba ka sngap lem ïa kane ka jingud jingkyrpad jong ki nongtrei Mid Day Meal bad ong ruh ba lada ka sorkar kam sngap kin sa shong ban ïa pyrkhat lang baroh ki dkhot bad nongïalam jong ka Union.
Kumjuh ruh i kong Beautiful Rymbai ba na Mookhep bad i kong Merciful Pyrngap ba na Shnongrim ki la pynpaw ka jingsngew khia bad kyrpad ïa ka sorkar ba kan sngewlem ïa ki ba ma ki ruh kin dup ioh mysniem ban trei ïa ka kam “khmihlynti ba ka sorkar kan sngew synei lem ïa ngi, ngi la ialeh shitom ha ka shet ja ïa ki khynnah ha skul, ngi la shah shitom na ka bynta ki khynnah skul, ngi kynduh jingeh pat ba ngi khlem ioh ïa kane ka honorarium mynta la 6 bnai, ha u snem 2022 ngi ioh T 30 bad mynta ngi la ioh T 60 tyngka shi sngi hynrei kane ruh kam biang bha ha ka rukom siew, kumta ngi kyrpad ïa ka sorkar ba kan sngewbha ban shim khia lem ban siew noh ïa ka bainong jon ngi”