Nongstoiñ, Ïaïong, 27: Ka kur Marweiñ ka dei kaba la bun paid haduh katta katta ha kaba ki dkhot jong ka kur ki don ha baroh ki bynta jong ka jylla bad shabar ka jylla ruh, kumta ki rangbah jong ka kur ki la sngew dei ban don ïa ka dorbar kaba kyrpang na ka bynta ban ïa ithuh khmat ïa baroh ki nongshong shnong kiba dei na ka juh ka jait ka kur.
Naduh u snem 1996 ki rangbah jong ka kur ki ïakynduh lang bad da kawei ka jingmut ki la ïakut ban pynlong noh da ka dorbar bah bad ha u snem 1998, la sdang ïa ka dorbar bah kaba nynkong eh.
Mynta u snem ka dei ka ka sien kaba khatwei ba ka jait Marweiñ ka la ïoh ban pynlong ïa ka dorbar bah ha ka shnong Umkrem Eastern West Khasi Hills kaba hap ha ka Mawïang unit.
Ïa katei ka dorbar bah kaba khatwei la pynlong ha ka jaka kaba hap ha ka khyndew jong ka kur Marweiñ kaba la tip kum ka Dom Marweiñ kaba don hajan ka shnong Wahliewlong. Ïa katei ka dorbar la pynïaid da u bah Trelington Marweiñ u president jong ka kur bad ka dorbar ka la long kaba ishong kun bha, ha kaba ki dkhot jong ka kur na kylleng ki jaka naduh mihngi, sepngi shatei haduh shathie ki la ïapoi.
Watla ki dkhot jong ka kur kim shym la ïapoi lut, hynrei tang kiba la ïa poi ha katei ka sngi ki la don palat ar hajar ngut kynthup ïa ki nongkitkam bad ki dkhot ka Executive Committee. Ha shuwa ban sdang ïa ka dorbar la ïoh ïa ka jingkren lamphrang na u president bad hadien kata la pdiang sngewbha ïa baroh ki kur kiba la wan poi na ka Mawïang Unit.
Ha katei ka dorbar la pynithuh ruh ïa baroh kiba wan poi sha ka dorbar na ki unit kiba don ha kylleng ki jaka kata naduh ka Ribhoi unit, Shillong unit, Mairang Nongkhlaw unit, Kynshi Myrïaw unit, Mawkyrwat, unit, Lawbah Mawpen unit, Markasa unit, Rangblang unit, Nongstoiñ unit, Rambrai unit, Mawshynrut unit, Nonglang unit bad kiwei kiwei. Hadien ka jingpynithuh la ïoh ban pynsngew ïa ka kaiphod jong ka jingtreikam jong ka Executive Committee jong ka kur.
Ha kajuh ka por la ïoh ïa ka jingkren na ki rangbah kur kata nyngkong eh na u Most Rev Bishop Wilbert Marweiñ, bah Paul Reader Marweiñ u ba la shong thait na ki kam sorkar ba u bat kum u Chief Engineer jong ka tnad PWD bad Chairman jong ka Meghalaya Public Service Commission bad khatduh eh la ïoh ïa ka jingkren na u ma R.Prowell Marweiñ.
Kitei ki rangbah kur haba ai jingkren ha katei ka sngi ki la pynkynmaw ba ka jingïalong shi tylli hapoh ka kur ka jait ka long kaba donkam haduh katta katta. Ki rangbah jong ka kur Marweiñ ki la pynsngew ba ki don kiwei pat ki jait kum ka jait Nongphud, Ryntong, Nongtnger, Diengngan bad Shrieh kiba kam ba ki dei ka juh ka jait bad ka kur Marweiñ.
Hynrei na ka liang ka Executive Committee jong ka kur ka la dep pan da ki jingthoh ban kin pynshisha ba ki dei na ka thymmei jong ka jait Marweiñ. Hynrei haduh mynta ym pat don kiba la pynpoi ïa ki jingthoh ban pynshisha ba ki dei kajuh ka jait bad ka kur Marweiñ. Wat la katta ruh ki rangbah kur ki la kyntu kynpham baroh kiba dei na ka jait Marweiñ kim bit ban ïashong kha bad kitei ki jait kiba la kdew.
Kaba kham sngew tynnad ka long ba ha katei ka sngi ka Jait Marweiñ ka la ïoh ban tang ïa kawei ka jait thymmai ïa ki arngut ki khun kiba u kpa u dei na ka jait Marweiñ, u ba la shongkurim ïa ka jaitbynriew Naga kaba dei ka jait Konyak (Naga). Hynrei hadien ba ki la ïoh khun arngut kawei ka kynthei bad uwei u shynrang, katei ka kurim jong u ka la phet noh bad ka la iehnoh ïa kitei ki khun ha u kpa ha kaba la sumar pat da ka hynmen kynthei jong.
Hynrei namar ba ka Kur Marweiñ kam shah satia ban ai jait ha u kpa, kumta la tang noh ïa kitei ki arngut ki khun da ka jait thymmai kaba la tip kum ka jait Wanweiñ bad ka kur ka jait baroh kawei ka la mynjur lang ba katei ka jait thymmai, ka dei ka jait ba la pynkha na u jait Marweiñ. Hadien ha bud ynda ki la ïoh la ki khun ki kti ki jait Marweiñ ki la dei ki Mei kha trai jong ka jait Wanweiñ.
