Shillong, Jylliew, 21: U Myntri Rangbah ka jylla u Conrad K. Sangma, ha ka sngi Thohdieng u la plie paidbah ïa ka Malangkona Police Outpost kaba don ha ka shnong Malang Simnaguri, ha West Khasi Hills ka ban ai jingshakri ïa ki 19 tylli ki shnong jong ka thaiñ Malangkona.
Ïa ka Malangkona Police Outpost la pynkha ha u snem 2019. Lyngba ka mang tyngka kaba T. 17.5 la la lah ban pynieng ïa ka ing treikam jong ka Out post ba la shna hapoh ka Police Infrastructure Renovation Fund (PIRF) scheme ha ka shnong Malangkona kaba hap hapoh kha Mawsynrut Civil Sub-Division.
Haba kren kum u kongsan u Conrad K Sangma u la ong ba ka jingshngaiñ bad ka jingïada ïa ki paidbah jong ka jylla ka dei kaba kam kaba hakhmat eh jong ka Sorkar.
Kane ka dei ka jingdawa kaba la slem jong ki paidbah ka shnong Malangkona ban don ïa ka Police Outpost. Kane ka shlem treikam jong ka Police Outpost ba thymmai kan phah ïa ka khubor kaba khlaiñ ba ka jingshngaiñ bad ka jingïada jong ki paidbah nongshong shnong ka dei kaba kongsan, la ong u Sangma.
U la ong ba ha kiwei ruh ki jaka kiba don ki jyrwit jyrwat ha kylleng ka jylla yn sa buh ïa ka Police Outpost ban pynthikna ba ki nongshong shnong kin ïoh jingïada
Shuh shuh u Myntri Rangbah u la ong ruh ba ka jingdon jong ka Outpost ha kane ka thaiñ kaba don hajan jong ka khappud jong ka Jylla Assam kan pynshngaiñ ïa ki paidbah ba kin ïoh ïa ka jingïada ban ban khanglad na kino kino ki jingjia basngewsih.
“Ka Sorkar Jylla ka la ïakren bad ka Sorkar Assam ban ïapynbeit noh ïa ki jaka ba don ka jingïakajia pud bad ngi dang pyntyllun shakhmat ban pynbeit noh sa ki hynriew tylli ki jaka ba don ka jingïakajia pud,” u la ong.
U la ong ruh ba ka Sorkar ka tip bha ïa ki jingeh ba la mad da ki paidbah kiba im ha ki shnong khappud bad u la kular ba ka Sorkar kan leh ïa kaba bha tam ban weng ïa ki jingeh.
U la pyntip ruh ba ka Malangkona Police Outpost kaba thymmai ka dei kaba la shna lyngba ka bhah pisa jong ka PIRF kaba la mang sha ki Superintendents of Police ba kin ïoh kham bun ka pisa ha kaba kin dup lah ban pyndonkam ha kaba maramot, ban shna iing thymmai ha ki District Level khlem da donkam shuh ban ïoh jingmynjur na ka Sorkar Jylla.
U Sangma u la ïaroh ïa ki paidbah ka Malangkona kiba la wan shakhmat ban ïarap ïa ka Sorkar ban trei kum ki nongbylla bad ban ïarap ruh ïa ki tiar ki tar.
“Kane ka dei ka nuksa kaba kongsan tam ha ka imlang ka sahlang ban ïatreilang bad kan long ruh ka khubor kaba bha ha ka jylla. Nga kwah ban pynshlur ïa kiwei kiwei ki shnong haba ki wan kum kine ki projek, ki paidbah ki dei ban wan shakhmat,” la ong u Myntri Rangbah.
Hadien ka jingïalang kala don ruh ka jingïathung dieng ha phyllaw katei ka outpost ha kaba la ïa shinbynta lang naduh u Myntri Rangbah u Symbud Myntri Rangah bad ki heh pulit ophisar ka Jylla
Ha kane ka sngi la sakhi lang da u Symbud Myntri Rangbah uba peit ïa ka tnat Kam Pohing Bah Prestone Tynsong, u MLA R Momin, ka DGP jong ka Jylla ka Kong Idashisha Nongrang, u MDC Bah Gigur Myrthong, u Superintendent of Police jong ka West Khasi Hills District Bikram D. Marak, Deputy Commissioner ka West Khasi Hills Bah Garod LSN Dykes bad kiwei de ki ophisar Pulit bad paidbah nongshong shnong.
