Khliehriat, Risaw 3 : Mynta ka janmiet ki pulit jongka Lumshnong Police Station, East Jaintia Hills ki la ïoh ban kurup haduh 44,900 bilor ka dawai Phyensedyl ba thmu ban khaïi beain sha Bangladesh na kawei ka trok kaba don u number JK02AU 5651.
Kat kum ka khubor pulit ba la ïoh la ïathuh ba u OC jongka Lum Shnong u Malthius Sangma u la ïoh jingtip na ki bor pulit kiba talasi ïaki trok hajan Lum Shnong hapoh ka jingïalam u Y.Syngkon ba ha ka por 2.20 katba ki dang talasi ïa ki kali hajan Lum Shnong Police Station la wan ïaid ar tylli ki trok kiba don ujuh u number plate. Kawei ka wan na ki thaiñ Umkiang bad kawei pat kaba wan mar pyrshah na ki thaiñ Khliehriat.
Mar kumta ki pulit ki la pynsangeh ïa kine ki trok hynrei kane kaba wan na ki thain Khliehriat kam sangeh satia bad u nongniah u la pynher sted pynban ïa ka trok. Kumta ki pulit ki la kthong ïa kane ka trok bad hadien katto katne por ki la lap ïa kane ka trok tangba u nongñiah u la phet krad sha khlaw. Ki pulit ki la wan ñiah noh ïa kane ka trok sha Lum Shnong Police Station bad la suba ba ka kit ïa ki mar ba thmu khaïi tuh. Kumta hapoh ka jingpeit jong u DSP Jason Myrom la talasi ïa ka trok bad la lap ba ka kit ïa ki dawai ba la ñiew beaiñ kiba don haduh 44,900 bilor ba la thep ha ki 150 tylli ki synduk.
Hadien kane la kurup ïa kine ki dawai bad la register case ruh ha Lumshnong Police Station bad ka jingtohkit ka dang ïaid ban tip bniah shaphang kane ka trok bad bad kiei ki briew kiba don kti.
