Shillong, Nohprah 05 : U Myntri Rangbah ka Jylla Conrad K Sangma hynne ka sngi u la kular hakhmat ka kynhun jong ka Meghalaya Football Association ban pynbha thymmai lut ia ka madan artificial turf jong ka Synjuk nalor ban pynbha ruh ia ka jaka khreh ki nongialehkai, ka jaka shong nongpeitkai bad ruh ka jingker.
“Ka Meghalaya Football Association ka pynpaw ka jingsngewkmen hadien ba u Myntri Rangbah u la kular ban shimkhia mardor ban pynbha thymmai lut ia kitei ki jingkyrpad ba ka Association ka buh,” ong u President ka MFA Bah Hamlet Dohling uba dei ruh ha kajuh ka por u Nongaibuit jong u Myntri Rangbah ka Jylla.
La iathuh ba katei ka jingleit kynduh jong ka MFA ia u Myntri Rangbah kadei ban pynsngew ba katei ka madan phlang plastik ka la sdang ban jot hadien ba ka la ai ka jingshakri kaba haduh palat 10 snem.
“Kane ka madan plastik kaba la sdang ha u 2009 lyngba ka projek jong ka FIFA ka Win in India with India, ka la pynmyntoi bad ai jingkyrkhu ia bun ki samla bad pyntbit ruh ia ki haduh ba kin da long mynta ki rangialehkai ba kynsai ha ki rta bapher bapher kynthup naduh ki shynrang haduh ki kynthei,” ong ka dorkhas ba ka MFA ka phah sha u Myntri Rangbah.
La kdew ruh ba kane ka madan phlang plastik ka la ioh ruh ban pynlong ia bun ki prokram ialehkai kiba heh ha ka jylla bad ruh ha ka ri. Kine ki kynthup naduh ki lympung ialehkai U-18 I-League haduh ki lympung knieh rung I -Legaue, ka National Sub Junior Boys Tournament, ka Meghalaya State League, Shillong Premier League, ka North-East Olympic Games, bad kiwei kiwei ki lympung kiba jylla long ka rynsan ia ki samla ban pyni ia ka jingtbit jong ki ha ki sap ba ki don khamtam ban sei ia ki nongialehkai ban mihkhmat wat ha ki lympung ialehkai jong ka Ri.
Ka dorkhas ka ong ruh ba mynta katba nang iaid ki snem, katei ka madan ka la sdang ban duh bun jaka namar ka por jong utei u phlang plastik kadei tang phra snem kata ruh namar ka jingtreikam khlem sangeh namarba ym don kiwei pat ki madan kiba kum kitei ha ka nongbah.
“Kumta ban pyntikna na ka bynta ban kyntiew shuh shuh ia ka phutbol ha ka jylla bad ruh ban plie lad ia ki samla da ki jaka ialehkai kiba biang, ngi kyrpad ia ka jingiarap lang jongphi na bynta kine ki jingdonkam,” ong ka dorkhas sha u Myntri Rangbah.
