Baroh shi katta ka tnad kaba ïakhun pyrshah ïa u drok hapoh ka jylla ka dei tang ka tnad Pulit bad teng teng ka tnad Custom jongka sorkar pdeng, hynrei ka long ka sien ba nyngkong eh ba ka tnad sorkar ka Social Welfare naduh ba la shimti bad peit ïa ka da u Myntri bah Paul Lyngdoh ka la paw bha ban ïakhun pyrshah ïa u drok. Lah ban ong ba ka long ka sien ba nyngkong ba ka tnad Social Welfare kan paw ha ki jingtreikam jongka pyrshah ïa u drok. Kaba kam itynnad ka long mynta ka kynti wat ka tnad ka koit ka khiah ruh ka la ïasnoh kti lang ha kane ka kam. Kine ki dak ki shin ki long kiba wanrah ka jingkyrmen ba yn lah ban rat dyngkong ïa u drok khnang ba ki khun samla kynthei bad shynrang kin im pat ka jingim kaba ïadei dur bad ka imlang ka sahlang.
Ka jingwanrah jongka tnad Social Welfare ïa ki mission treikam ha ka jingïakhun pyrshah ïa u drok da ka Drug Rehabilitation, Elimination and Action Mission (DREAM) bad Bringing Unity in Locale Against Drugs (BUILD) ban ïatrei lang bad ki Bor Synshar Shnong, ki Nongïalam Niam, ki Seng trei mon sngewbha ban ïakhun ïa u drok bad kiwei kiwei ka la long ka jingkmen bad jingkyrmen ïa ka jylla. Ym lah ban len naduh ba u bah Paul u la shimti ïa ka tnad Social Welfare ka thong kaba hakhmat eh u la buh ka long ba un ïakhun pyrshah ïa ka thma bad u drok uba la pynjot pynpra ïa ka imlang ka sahlang bad ïa ki shnong ki thaw bad ki long ïing longsem. Kane ka jingkut jingmut bad jingbuh thong jongu ka la nang ïaid shaid shaid da ki kam khamtam da ka jingïoh ïa ki ophisar kiba aiti ban trei ïa ka kam.Wat la katta ruh dang shen u bah Paul u la pynpaw ba u dang donkam bun ki ophisar kiba tbit bad lah ban bud dien ïa ki skhim bad ki prokram na ki tnad sorkar pdeng na Delhi namar ka tnad Social Welfare ka don ka jingïadei bad kiba bun tylli ki tnad sorkar pdeng. Ngeit skhem ba ka sorkar kan pynkhlaiñ shuh shuh ïa kane ka tnad namar ka tnad Social Welfare ka dei ban long ka tnad kaba heh namar ka dei ma ka ba peit ïa ki jingeh ki kynthei khynnah, kaba ri bad kdup ïa ki khun swet, a kiba la ngop bad kyrni ha ki jingdih buaid, ka dei kane ka tnad kaba peit ïa ka jingkoit jingkhiah jong ki kmie ba pun ba kha bad ïa ki khyllung bad bun kiwei kiwei ki kam ba ka peit.
Mynta lei lei da kaba buh ïa kane ka thong hakhmat eh ban ïakhun pyrshah ïa u drok, ka jingkit ka la nang khia nangkhia. Ka jingkyrmen skhem ka long ba ki Dorbar Shnong, ki Nongïalam Niam, ki Seng Bhalang trei mon sngewbha bad ki paid nongshong shnong kin ïatrei lang bad ka sorkar naduh kane ka tnad social welfare, ka tnad Pulit, ka tnad ka koit ka khiah khnang ban lah ban pynurlong ïaka jingthrang. Namar lada ym kyndit bynriew mynta sa tang katno ka jaidbynriew ka lah ban duh jait namar wei ba ki khun samla ki la ngop ha ki jingkyrni ba sniew kata kum ha u drok bad ka kyiad ka lawei jongka jaidbynriew ruh ka don hapdeng ka jingkah dum. Kumta kane ka dei ka por mynta ban ïatrei lang noh khlem da phai shuh sha ka diang ka mon hynrei ban peit beit sha kawei ka thong kata ban rat dyngkong ïa u drok namar lada ïatrei lang naduh ki bor synshar shnong ki paid nongshong shnong bad ki seng bhalang trei mon sngewbha bad ki bor sorkar ym don jaka ïa kita ki nongkhaïi ne ki nongdih ba kin ïoh ban leh ïaki kam beaiñ la ka dei ha kaba pynïaid ïew ïa u drok ne kiba thied bad dih ne injek ïa u drok.
Kumba u Myntri Rangbah u la pynpaw ba ka sorkar ruh kan ïarap ïa ki Dorbar Shnong bad ki Seng Trei Mon Sngewbha kiba ïakhun pyrshah ïa u drok, kumba u la leh mynta ka sngi ïa ka Dorbar Shnong Mawlai da kaba ai 6 lak tyngka namar ki la sdang ïa ka Rehabilitation Centre na ka bynta kito ki khun samla kiba la ngop ha u drok khnang ba kin ïoh ban ïarap bad pynïaid shakhmat ia ka kam. Khlem pep lyngba kine ki jingpynshlur ka sorkar ki Dorbar Shnong, ki Seng Bhalang trei mon sngewbha kin mih shakhmat ban ïakhun pyrshah ïa u drok. Kaba donkam kyrkieh eh mynta ka long ba ka sorkar kan tei kloi noh ïa kita ki Rehabilitation Centre khnang ba kito kiba la ngop kin ïoh ban sah ha kum kitei ki jaka ba kin ïoh ki jingsumar bad jingïasyllok na ka sngi sha ka sngi.
