Guwahati, Jymmang, 04: U President ka India, u Ram Nath Kovind u la leit ban ïashim bynta ha ka annual conference kaba 61 jong ka Bodo Sahitya Sabha ha Tamulpur, Assam mynta ka sngi.
Ha ka jingkren jong u, u President u la ong ba ka shongsuk shongsain bad ka jingshngain ha ka thain ka la kham bha lyngba ka jingïatreilang jong ka Sorkar Pdeng bad ki Sorkar Jylla ha ka thain shatei lammihngi. U la ong ba ki kam kiba ïadei bad ka roi ka par ki don ka bynta kaba khraw ha kane ka jingkylla. U la ïaroh ïa ka Sorkar Pdeng bad ki Sorkar Jylla bad ruh ki briew jong kane ka thain kiba la wanrah ïa kane ka jingkylla.
U President u la ong ba u bnai Jymmang u long uba kyrpang ïa ki jaitbynriew Bodo namar ki kynmaw ïa u Bodofa Upendra Nath Brahma ha ka lyngkhuh sngi ïap jong u kaba hap ha ka 1 tarik u Jymmang. U la ong ba u Bodofa u pynsaphriang ïa ka jinghikai ‘im bad shah ïa kiwei ban im’. Ka jinghikai jong u ban pynthikna ïa ka shongsuk shongsain hapdeng ki jaitbynriew bapher bapher kata ka don ruh ka jingbat ïa ka burom jong ki jaitbynriew Bodo kan long kaba ïahap shirta.
U President u la ïaroh ïa ka Bodo Sahitya Sabha kaba la noh synniang mynta la palat 70 snem ban pynkhlain ïa ka ktien Bodo, ka jingthoh bad ka kolshor jong ki Bodo. U la ong ba u nongseng bad president jong ka Bodo Sahitya Sabha, u Joy Bhadra Hagzer bad u General Secretary Sonaram Thosen ki la trei shitom ban ïoh jingithuh ïa ka ktien Bodo. Kane ka Sabha ka la trei shitom ruh ban pyndonkam ïa ka ktien Bodo ha ka jingai jinghikai ha ki skul bad ka jingpyndon-kam ïa kane ka ktien ha ki klas kiba kham halor.
U President ula ong ba haduh mynta, ki don 17 ngut ki nongthoh kiba la ïoh ïa ka khusnam Sahitya Academy Award namar ki kam jong ki kiba ïadei bad ka ktien Bodo, 10 ngut ki dei kiba thoh ïa ki poitri. Kane ka pyni ba ki nongthoh Bodo ki sngewtynnad ïa ki kam thoh poitri.
