Nongpoh, Risaw 31: Ka ophis u Superintendent of Police ka Ri-Bhoi District mynta ka sngi kala pynlong ïaka 5KM Run for Unity ha ryngkat ka jingïatrei lang ka ophis u District Sports Officer ka Ri Bhoi lem bad ki bor district ka Ri-Bhoi kaba la long mynta ka step jong ka 31 tarik u Risaw 2025 kum ka dak ka jingrakhe ïaka National Unity Day.
Ïa kane ka dei ka jingïamareh thong lane ka 5km Run for Unity la sdang naduh ka por 6:30 mynstep na Indoor Stadium Saiden bad pynkut ha Indoor Stadium Umlyngkdait ha kaba wat hapdeng ka jingjur u lapbah ki samla ki la shim bynta shitrhem ha kane ka jingïakop mareh thong.
Ka jngthmu jong kane ka jingmareh thong ka ka long ban wan rah ka jingïatylli hapdeng ki khun samla ban trei na ka bynta ka bha ka miat ka imlang ka sahlang bad ruh ban hikai ïa ki samla ba ki dei ban long kiba koit ba khiah bad ban kiar na kiei kiei ki jingdih ba sniew.
U Senior Superintendent of Police ka Ri Bhoi u VS Rathore u la shim ïa ka bynta ban kaweh lama kum ka jingsdang kane ka jingïamareh thong ha ryngkat ka jingdon lang u Bah Orville Massar Additional SP, u Bah Bobby Nongbet DSO Ri-Bhoi District lem bad kiwei kiwei de nalor ki samla bad wat kiba la noh ka rta kiba la shim bynta ha kane ka jingïamareh thong.
Ha kane ka sngi la pynbna ruh ïa ki nongjop jong ka jingïamareh thong ha kaba na ka liang ki shynrang la rah ïa nam lahduh da u Samla Monas Bongrung, u Skhemlang Suba ha ka kyrdan ba-ar bad u Piku Nath haka kyrdan ba lai, katba na ka liang ki kynthei pat ïa ka nam lahduh la rah da ka samla Samla Felinza Hansepi, ka samla Jeny Ramde ka la wan ha kyrdan ba-ar bad ha kyrdan ba lai la ioh rah da ka samla Dakahi Khymdeit.
Lyngba jong kane ka sngi, la sam ruh ïa ki khusnam kyrpang sha ki nongshim bynta kiba la ioh ban khur ïa ka nam jop bad la sam kyrpang ruh ïa ki khusnam sha ki nongshim bynta bala rangbah tam ba la rah ïa ka nam lahduh da u Bah Pel Bey na ki shynrang bad ka Kong Sonra Rani na ka liang ki kynthei kiba la ioh pdiang ïa ki trophy bad ki song pisa.
