Shillong, Risaw 31: Ka lympung ïalehkai ‘28th Meghalaya State Level Kickboxing Championship 2025’ kaba la ap khmih lynti bha ka la sdang ha ka sngi Thohdieng (31 tarik Risaw) ha Laitkor Kynton U Mon, Meghalaya School Of Martial Arts (MSMA), Training Centre, Head Quarter, ryngkat ka jingïashim bynta shitrhem na ki nongïalehkai kiba na kylleng ka jylla.
Kane ka championship ba la pynlong da ka Meghalaya Association of Kickboxing Organization (MAKO) kan poi sha kaba kut lashai ka sngi Saitjaiñ, 01 tarik Naiwieng, 2025.
Ha ka sngi sdang ïa kane ka lympung la sakhi ïa ka jingdon lang ki riew pawkhmat, ki nongpynïaid, ki coach, bad ki nongkyrshan kiba la ïalum lang ban ai mynsiem ïa ki samla bad ki nongïalehkai kickboxing kiba don sap kiba mihkhmat ïa la ki kynhun bapher bapher jong ki distrik ka jylla Meghalaya.
Haba kren ha ka jingïalang plie pyrda, ki nongpynïaid ki la pynpaw ka jingsngewnguh ïa baroh ki kynhun kiba ïashim bynta, ki referee, ki nongïalam na ka bynta ka jingaiti bad jingkitkhlieh jong ki ban kyntiew ïa ka jingïalehkai kickboxing hapoh ka jylla. Ki la pynpaw ruh ïa ka jingpyrshang ba bteng jong ka MAKO ban pynroi ïa ki sap ba dang khynnah bad ban pynkhlaiñ ïa ka kyrdan jong ka Meghalaya ha ka ri bad ha ka pyrthei.
Kane ka lympung ka thmu ban kyntiew ïa ka mynsiem ïalehkai, ka jinglong ryntih, bad ïa ka koit ka khiah jong ka met hapdeng ki samla, katba ka ai ruh ka lad ïa ki nongïalehkai kiba dang mihpaw ban pyni ïa ka sap ba tbit jong ki bad ban ïoh rung sha ki jingïakop kiba kham halor.
Kane ka lympung kaba ar sngi kan don bun jait ki kyrdan bad ki jingïakhun, ha kaba ki nongïashim bynta ki ïakhun ban ïoh khur takma bad ka burom jong ka jylla.
Ki nongjop na kane ka lympung kin mihkhmat ïa ka Meghalaya ha ka National Championship ka ban wan hapoh ka lama jong ka National Kickboxing Federation (NKF) (NG).
