Shillong, Risaw 31: Ka Rangdajied United ka la pynthikna ïa ka jaka ha ka semifinal jong ka SSA Super Cup ba nyngkong eh da kaba jop 3-0 kol ïa ka Nangkiew Irat ha ka jingïakhun Quater final playoff ba nyngkong ha madan First Ground-SSA Stadium, Polo, ha ka janmiet jong ka sngi Thohdieng.
U Benny V Khriam u la pynkhih ïa ka kol kaba nyngkong ha ka minit kaba 36 jong ka kylla step hadien ba u la ïohpdiang ïa ka bol pashat na u Pasborlang Khonglikong. Nangta u Dibormi Kassar (73’P, 85’P) u la thep ar tylli ki penalty ha ka kylla miet.
Ka SSA Super Cup, ba la pynlong da ka Shillong Sports Association, ka wanrah sa kawei pat ka kyrdan jong ka jingïakhun bad jingshongshit na ka bynta ki nongkyrshan, ha kaba ki 6 tylli ki kynhun ba kynsai tam (Top 6) jong ka Shillong Premier League 2025 ki ïatynjuh bor ha ka rukom ïalehkai kaba tang shi wait lane knockout. Ka Nangkiew Irat bad ka RUFC ki la pyndep ha ka kyrdan ba saw bad ba san ha ka SPL bad ki la ïakhaid ha ka jingïakhun ba ladep jong ki ha ka League, kaba la long ha ka 05 tarik Nailur, da mar 1-1 kol.
Da kane ka jingjop ka Rangdajied kan sa ïakhun pyrshah ïa ka Langsning ha ka semifinal kaba nyngkong kaba la buh ban long ha ka 07 tarik Naiwieng. Kum ka lahduh jong ka Shillong Premier League 2025, ka Langsning bad ka kynhun ba wan ba ar ka Shillong Lajong ki la rung beit beit sha ka semi final.
Haba phai sha ka jingïakhun, baroh arliang ki la long kiba husiar bha, namar kadei ka lympung ïalehkai kaba lada rem ka jingkhmihlynti ban dang ïaid shakhmat ka la kut shi syndon.
Hynrei hadien shiteng kynta tam ba la ïaid ka jingïakhun u Benny u la ïoh ban pynïakhlad ïa kine ki arliang da kaba thep ïa ka kol kaba nyngkong hadien ba u la ïohpdiang ïa ka bol na u Pasborlang.
Baroh ar tylli ki kol ha ka kylla miet ki la wan lyngba ka penalty namar ki foul hapoh phyllaw kol. Kaba nyngkong kadei namar ba u Kitdorlang L Nonglait u la khynniat pynur ïa u Pasborlang, katba kaba ar kadei hadien ba u Dibinroy u la tan ïa u Dibormi tang hadien katto katne minit shuwa ban jam sha ka minit kaba khatduh. U Dibormi u la shimti ïa baroh ar tylli ki kabu ksiar khlem da pynsep ei.
Ynda la kut ka jingïalehkai, ka la don ka jingsam khusnam, ha kaba u Mebanshngain Kurkalang u la ïoh khur ïa ka nam T7 Player of the Match, bad ïoh ruh ïa ka memento ryngkat ka khusnam pisa kaba T.5 hajar na u Working President ka SSA u Bah Robert Dkhar.
Ha kane ka sngi Saitjaiñ ka jingïakhun kan long hapdeng ka kynhun ba wan kyrdan ba lai bad hynriew ha ka SPL, ka Mawlai pyrshah ïa ka Sawmer ha ka por 5 baje janmiet. Ka nongjop na kane ka jingïakhun kan aireng pyrshah ïa ka Shillong Lajong ha ka semifinal kaba ar.
