Shim bynta shitrhem ki rang bad thei sotti ha ka Shad Suk Mynsiem jong ka Seng Khasi

Nongstoiñ, Jymmang 25: Kumba ju leh man la u snem ka Seng Khasi West Khasi Hills, ka ju pynlong ïa ka shad suk mynsiem shisien man la u snem na ka bynta ban ai nguh ai dem ïa u Blei Nongthaw Nongbuh ïa u khun bynriew ha kane ka sla pyrthei.
Kumta mynta u snem ruh ka la pynlong ïa katei ka shad suk mynsiem ha madan jong ka shnong New Nongstoiñ kaba la sdang ha ka por noh phai sngi haduh da pynkut. Ha katei ka shad suk mynsiem la wan ban ïashim bynta shitrhem da ki rang bad ki thei sotti na ki lai tylli ki District, kata na Eastern West, South West bad West Khasi Hills.
Ha shuwa ba ka jingshad kan sdang, u rangbah nongpynïaid jong ka Seng Khasi u la duwai phirat bad ai nguh ai dem ïa u Nongthaw Nongbuh ïa ka long briew man briew ïa ka longkur long jait ban roi parum pareh ha u tnum u tyndai ha kane ka snieh pyrthei.
Ha kane ka sngi ka ksing ka dhah bad ka tangmuri ki sawa bad pynpaw ïa ka dak jong ka niam ka rukom ba la buh naduh kulong kumah. Naduh ki khynnah ba dang rit ki la ïashim bynta shitrhem ha ryngkat ki khor ki khriam jong ka riam tynrai kaba ishongkun bha.
Ha kane ka shad Suk Mynsiem lyngba ka Seng Khasi West Khasi Hills, ki la don haduh 214 ngut tam ki nongshad kaba kynthup ïa ki kynthei bad Shynrang kiba la wan ban ïashimbynta ha katei ka jingleh niam ne ka shad tynrai.
U babu P. Ryntathiang Lamphang ka Seng Khasi West Khasi Hills District, u la ïathuh ba ha kane ka jingshad ka khlem don kano kano ka jingpynthud jong u slap, wat haba u la ther khlem sangeh naduh mynnin haduh ka por 3 baje mynta ka sngi, shuwa ban pyndep ïa ka nguh ka dem jong ka seng bad mar syndep ka jingduwai hi ka suiñ bneng ka la plie ïa ka lad ban ïoh sdang ïa ka jingshad.
La ong shuh shuh ba kane ka Shad Suk Mynsiem ka dei ruh kaba 25 mynta u snem, namar ba la sdang ïa kane naduh u snem 2000 bad ïa kane ka jingshad, ym shym la pynlong da kaba shu ïa mynjur shongshit ruma ne leh khlem ka nongrim. Hynrei, la ju duwai phirat bad da kylli pyrthew na u kynrad u nongbuh nongthaw, la u shah ne em ban pynlong ïa ka jingshad, ong utei u Lamphang.
Ha kane ka sngi u bah O.Pyngrope Lamphang ka Seng Khasi Sengkmie na Shillong, u la ïoh ban pynhap ïa ka lama jong ka seng ryngkat ka jingïadonlang u bah Hainess Marbaniang Pyndap Phang ka Seng Khasi Sengkmie bad kiwei kiwei ki tymmen ki San ka seng, ryngkat ka jingïasakhi lang ruh u bah Garod LSN Dyke Deputy Commissioner ka West Khasi Hills District bad kiwei kiwei ki ophisar.