Dang shngaiñ ka Meghalaya na u COVID, pynap lypa ka Meghalaya kumno ban ïakhun pyrshah

Shillong, Jymmang 26 : Ka tnad ka Koit ka Khiah jong ka sorkar jylla ka la pynkhreh bad pynap lypa kumno ban ïakhun pyrshah ïa ka khlam COVID-19 hadien ba kane ka khlam ka la sdang ban khieh ha kiwei ki bynta jong ka Ri.
Kumta, ha kane ka sngi Nyngkong, ka tnad ka la lum ïa ka jingïalang ban peit ïa ka jingpynkhreh ryngkat bad ka Medical Expert Committee ban buddien ïa ka rukom ïakhun pyrshah ïa kane ka khlam.
Ïa kane ka jingïalam la pynïaid da u Principal Secretary ka tnad ka Koit ka Khiah ka sorkar jylla, u Sampath Kumar ha kamra treikam jong u ryngkat ki heh ka tnad ka koit ka khiah bad ki nongmihkhmat na ki jaka sumar jong ka sorkar jylla kumjuh na ki jaka sumar shimet kiba don ha ka jylla.
Ha kane ka jingïalang pyrkhat kam la pyni ruh ïa ka jingpynkhreh ba la maitphang da ki State Survelliance Officer, Integrated Disease Survelliance Programme da kaba phai dien ïa ka jingïakhun jong ka jylla ïa ka khlam COVID naduh u Jymmang 2020 haduh u Jymmang 2025. Ha kane ka jingïalang la phai dien ruh ïa ka jingai tika bad ka koit kaba ïadei bad ki paidbah.
La pynshai ruh ba kumba long haduh mynta hi, ym pat don satia kino kino kiba la ïoh ïa kane ka jingpang COVID-19 ha ka jylla. Hynrei la banjur pat ïa ka jingdonkam ban peitngor bad phikir bha da kaba don kham bun ki jaka test bad ki jingpynkhreh.
La bthah ruh ïa baroh ki jaka ai jingsumar jong ka sorkar bad ki jaka sumar shimet ba kin pynkhlain shuh shuh ïa ka jingpynkhreh ban ïakhun ïa kane ka khlam kynthup ïa ka jingdon ki oxygen, ki jaka sumar ïa kiba kham shitom jur ne ki critical care, bad ruh ki kyndon ban peitngor ne buddien ïa kiba ïoh ïa ki jingshitom ring ne pynhiar mynsiem ba tip kum ki Severe Acute Respiratory Infection bad ruh ïa ka Influenza-like-Illness (ILI) bad kumjuh ïa kiba don ka jingshitom khie shit.
La bthah ruh ban peit ïa ka jingdon ki dawai kiba kham kongsan bad ruh ïa ka jingtreikam ki jaka test ha baroh ki distrik. Na ka liang u Principal Secretary u la kyntu ruh ïa baroh ban long kiba peitngor bad shimkhia khamtam ïa ki jingshitom kum ka ILI, SARI bad ki jingshitom khie shit khamtam ha kito ki jaka ba jur bha ka jingbun briew ne jaka iew bad ki jaka paidbah.
La bthah ruh ïa ki jaka sumar ban pynthymmai ïa ki kyndon pohiing bad phaidien biang ïa ki kyndon jong ka khlam COVID 19. La ong ba na ka liang ka tnad hi ka shimkhia ban peitngor, ban peit ba ki paidbah kim dei ban rit mynsiem ne khuslai. Ka kyrwoh na ka tnad ka ong ruh ba kin ïa trei lang ryngkat ryngkat bad ki stad ka koit ka khiah na ka bynta ka jingshngain jong ki paidbah ka jylla.