Nongpoh, Nohprah 05: Ka Skulbah University of Science & Technology Meghalaya lyngba ka USTM Founder’s Day celebration, ha ka 3 tarik u Nohprah 2024, ka la pynkut noh ïa ka Dr. Donkpar Roy memorial National Debate Competition ba la pynlong ha Central Auditorium katei ka skulbah.
Ha kane ka jingïatai ñia la wan shim bynta da ki samla pule na ki skulbah bapher bapher na kylleng a ri bad kane ka jingïatai ñia ka dei ka jingïakop kaba ju pynlong man la u snem shi bynta ban kynmaw burom ïa u Dr. Donkupar Roy, uba dei u myntri rangbah barim ka jylla.
Kum ka jingpynshlur ïa ki samla pule kiba la shim bynta ha kane ka jingïakop tai ñia, katei ka skulbah ka la sam ruh ïa ki khusnam ba la sam da u Mahbubul Hoque, uba dei u Chancellor ka USTM, ryngkat u Prof. G.D. Sharma, Vice Chancellor ka USTM. Ïa ka nam best team award la rah da ka Parismita Kakati bad ka Priyanka Saha na ka Handique Girls’ College, kiba la ioh khur ruh ïa ka song pisa kaba T. 25000.
Kiwei ki khusnam ki kynthup ïa ka first best debater award ba la rah da ka Akansha Sarma na ka National Law University, Assam, ryngkat ka song pisa kaba T.10,000. Ïa ka nam Second Best Debater award la rah da ka u Gaurav Kashyap na JB Law College, ba la khur ïa ka song pisa kaba T. 7,000. Bad ïa ka nam third Best Debater la rah da u Mintu Deka uba dei na Gauhati University, uba la ioh rah ai ka song pisa kaba T. 4,000.
Ka phang pdeng jong kane ka rynsan ïakop tai ñia ka dei, ‘“Globalization is a Threat to Indigenous Society.” ha kaba la wan shim bynta da ki nongbishar ba kynthup ïa u Prof. Sambit Mallick (IIT Guwahati),Prof. T.T. Haokip (NEHU, Shillong), bad u Dilip Chandan (Editor, Asom Bani).
Ki nongïashim bynta kiba wan shim bynta ha kane ka jingïakop tai ñia, ki kynthup na University of Delhi, Gauhati University, Amity University Gwalior, Cotton University, NEHU, JB Law College, Assam Royal Global University, Handique Girls’ College, Zakir Husain Delhi College, Shillong Law College, Loreto Convent, SPM Guwahati, B. Borooah College, St. Anthony’s College Shillong, National Law University and Judicial Academy Assam, Kharupetia College, Swahid Sowarani College, bad Darul Huda Islamic University.
Haba kren ha kane ka sngi, u Mahbubul Hoque, Chancellor ka USTM, u la ban khia halor ka thong katei ka skulbah ban phrang ïa ka jingtbit ki samla ha kum kine ki rynsan ïa tai ñia. U la ong ruh, ba kane ka Dr. Donkupar Roy Memorial Debate, kan ai lad ïa ki rynsan bad pynshlur ïa ki samla ba kin shim bynta ha kum kine ki jingïatai ñia ba don jingmut bad kiwei kiwei ki phang ba donkam ban ïa tai na ka bynta ka imlang ka sahlang, kaba long ruh shi bynta ban burom ïa u Dr. Donkupar Roy kum u nongïalam ba la noh synñiang shibun ha ka jylla.
