Shillong, Kyllalyngkot 12: Ka kynhun Power Grid ryngkat bad ka Inningstar ki la lah ban khur jingjop ha ka jingtïalehkai kaba la long hynne ka Sngi jong ka lympung ïalehkai kriket kaba la tip da ka Shillong Cricket League 3rd division ba la pynïaid da ka Shillong Cricket Association ha ryngkat ka jingïatreilang bad ka Samkhamti ha madan Urkaliar.
Ka jingïakhun kaba nyngkong ka la long hapdeng ka Power Grid pyrshah ïa ka Sawmer, ha kaba ka kynhun Power Grid ka la jop ïa ka toss bad jied ban bol nyngkong.
Haba shim ïa ka pali tied ka Sawmer ka la lah ban kynjoh sha ka 110 ron bad hap 9 wicket haduh kaba kut jong ka over ba la buh.
Napdeng ki nongtied kiba la ïoh ban kamai bun ron ïa ka kynhun ki kynthup ïa u Yohun Shadap u ba la tied 24 ron naki 24 bol, katba u Pynshngain Rymmai u la kamai 23 ron naki 27 bol.
Ki rangkawangbol na ka liang pyrshah kiba la seisoh ki long u Kunwardhrub u ba la kawang 4 over , ailad tang 22 ron bad khur haduh 4 wicket. Nangta u Babul Doley u la ïoh ban kawang 4 over, ailad 17 ron bad khur 3 wicket.
Haba beh ïa katei ka ron ba la buh, ka Power Grid ka la lah ban tied haduh 111 ron hapoh ka 16.3 over bad hap tang 8 wicket kaba la pynlong ïa ka kynhun ban khur ïa ka jingjop da 2 wicket.
Na ka liang jong ki rangkawangbol ka Sawmer ki la ïalehkai bha, ha kaba u Badap Tynsong u la kawang 3.3 over, shah tied 26 ron bad khur 3 wicket, katba u Donkupar Jyrwa u la kawang 4 over, shah tied 23 ron bad pynhap 3 wicket, hynrei kane kam shym la lah ban ïarap ban pynïoh jingjop ïa ka kynhun.
Katba na ka liang jong ki rangtied ka Power Grid, u Kunwardhrub u la khyrwit marshiteng ïa ka spah ron, kata da 54 ron naki 40 bol, u Pradeep Varun u la kamai 23 ron naki 18 bol. ïa ka nam Player off the match la khur da u Kunwardhrub u ba la tied 54 ron ryngkat bad ka pynhap wicket.
Haba phai pat sha ka jingïakhun kaba ar hapdeng ka Young Langsning pyrshah ïa ka Inningstar XI, ka kynhun Young Langsning ka la jop ïa ka toss bad jied ban tied nyngkong.
Kane ka kynhun ka la lah ban tied pyndep baroh ka 20 over bad kamai 163 ron hap da 7 wicket.
U wei na ki rangïalehkai ka Young Langsning, u Winningstar khongjoh u la jan kynjoh sha ka spah ron ha kaba u la tied 84 ron naki 55 bol, katba u Gavin Nongkynrih u la kamai 34 ron naki 38 bol.
Haba phai sha ki rangkawangbol ka liang pyrshah, u Ankit Chettri (4 over: shah tied 19 ron: khur 2wicket) bad u Abhishek Kumar Yadav (4 over: shah tied 36 ron: khur 2wicket) ki dei kiba la seisoh.
Haba jubab ïa kane, ki rangtied ka Inningstar ki la khyrwit 167 ron hap tang 6 naki 20 over ban khur ïa ka jingjop da 4 wicket.
Watla ki rangkawangbol jong ka Young Langsning, ba kynthup ïa u Bankupar nongkseh (2 over: shah tied 25 ron: pynhap 2 wicket) bad u Aibanshalstar (3 over: shah tied 18 ron : khur 1 wicket) ki la trei shitom hynrei phewse ka jingtbit ki nongtied ka liang pyrshah ka la pynlong ïa ka kynhun ban shah rem.
U Ankit Chettri u la tied 37 ron na ki 25 bol, katba u Adit Kumar u la khyrwit 68 ron naki 51 bol bad ban khur syndon ïa ka khusnam Player off the match ha kane ka jingïakhun.
