Tura, Kyllalyngkot 12: Hynne ka sngi ka sorbah Tura ka la sakhi ïa ka jingplie paidbah ïa ka Pa Togan Nengminja Sangma Athletics Stadium ïa kaba la khmihlynti ban long kawei na ki jingtei ban kyntiew shaphrang ïa ka sport hapoh ka Jylla.
Kane ka jingtei kaba la ai kyrteng ban ainam sha u wei na ki riewïakhun ban pynïoh jinglaitluid, u Pa Togan Sangma, la shna ha ka jinglut kaba la kot 16.02 klur, kaba la pynïeng ha katei ka sor ban pynshlur ïa ki khynnah samla ka thaiñ ban pyndonkam hok ïa la ka sap ha ki rynsan ïalehkai.
Ha ka sngi plie pyrda ïa kane ka jingtei, la don ryngkat ruh u Myntri Rangbah ka Jylla, u Conrad K Sangma, u Lamphang jong ka ïingdorbar (Meghalaya Legislative Assembly), u Thomas A. Sangma, u Myntri ka tnat ïalehkai, u Bah Shakliar Warjri, u Marcuise N. Marak (Minister of Housing, PHE & Soil & Energy Conservation), u Bah John F. Kharshiing- u ba dei u Working President jong ka Meghalaya Sports Olympic Association, ka Director of Sports & Youth Welfare-ka Kong Isawanda Laloo, u Jagdish Chelani, IAS, Deputy Commissioner, West Garo Hills, bad u Bah Finely. L. Pariat-General Secretary jong ka Meghalaya Athletics Association.
Kane ka stadium, la tei ryngkat bad 8 tylli ki lane kaba la pynïasyriem bad ki lane kumba long ki madan ha kiwei pat kum shi bynta ban kyntiew bad sei ïa ki lahduh na kane ka thaiñ.
Ka jinglah ban pyndep ïa kane ka jingtei ha ka por kaba biang, kan ïarap ïa ka Tura ban pdiang pynlong ïa ka 5th Meghalaya Games 2024, kaba pyni ruh ïa ka jinglong ba la kloi ban ïoh pynlong ruh ïa ka national sporting event.
Shuh shuh, kane ka stadium ka la lah ruh ban pdiang da kaba seisoh ïa ka North East Olympics ha kaba palat 4000 ngut ki nongïashimbynta na 8 tylli ki Jylla ki la wan.
Ha kaba ïadei bad kane na ka liang jong u Conrad K Sangma u la ong, “Ha kine ki khyndiat snem ba ladep, ki nongïalehkai ka Meghalaya ki la lah ban wanrah nam ha ki kyrdan ïalehkai bapher bapher, ka sakhi kaba pyni ba kane ka Jylla ka don shisha ïa ki samla kiba don ïa ka sap kyrpang ha ki rynsan jingïalehkai. Ka jingïaidlynti ban ïoh kheit ïa u soh ka jingjop ka la sdang naduh 2020-21 ha ka por ba la sdang ïa ka project kaba la mang 16.02klur. Mynta ngi la lah ban pyndep ïa kane ka stadium Eight-lane athletic track, kaba long katkum ka international standard. Ngi la pyrshang ruh phaikhmat sha ka grassroot sports ha kaba 200 tylli ki jingtei ka ban kot haduh 500 klur. Shuh shuh ka Meghalaya Athletics Association kan plie lad ruh ïa kiwei pat ki jait jingïalehkai kum ka Cricket, Football, ki jingïalehkai Tynrai lane ki Traditional sports lem bad kiwei kiwei”.
“Ka jingthmu ka jong ngi ha u snem 2032 ka dei ban suh thied mynta bad Nga pynshlur ïa ki samla na Garo Hills ba ki dei ban shim ïa kane ka kabu ban kiew ha ka kam ïalehkai.” la bynrap u MR ka Jylla.
Kane ka Stadium ka pyni ruh ïa ka jinglong ba la kloi jong ka sorkar ban kyntiew ïa ka Sports hapoh ka Jylla.
