Shillong Cricket League 2024:Lahduh ka Lawsohtun ha ka 3rd, ka Golflink 11 Star ha ka 2nd Division

Shillong, Rymphang 16: Ka Shillong Cricket Association ha ryngkat ka jingïatreilang bad ka Samkhamti ka la ïoh ban khylliap noh ïa ar tylli ki kyrdan ïalehkai jong ka Shillong Cricket League kaba la pynlong ha madan Urkaliar , ha kaba ïa ka jingïakhun final la pyndep hynne ka sngi.
ïa ka namlahduh ha ka kyrdan ïalehkai 3rd Division la rah da ka kynhun Lawsohtun CC, katba ka kynhun ïalehkai Golflink 11 Star ka la long ka lahduh ha ka kyrdan ïakhun 2nd Division.
Ka jingïakhun final kaba nyngkong ka la long ha ka kyrdan 3rd division ha kaba ka Lawsohtun CC ka aireng pyrshah ïa ka Metallica Rising Stars. ïa ka toss la jop da ka Lawsohtun CC ha kaba ka la jied ban bol nyngkong.
Haba shim ïa ka pali tied nyngkong, ka Metallica Rising Stars ka la shah pynhap baroh ki wicket ha ka 15.1 over hadien ba kynjoh 102 ron. Dei tang u Nabindu Das u ba la seisoh ha ka tied da 64 ron naki 39 bol.
Haba phai sha ki rangkawangbol ka Lawsohtun u Hilar Thabah u la kawang 3.1 over, shah tied 32 ron bad khur haduh 4 wicket, katba u Cavin K Wanniang u la kawang 2 over, shah tied 8 ron bad pynhap 3 wicket.
Haba shim ïa ka pali tied ka Lawsohtun CC ka la pyndep ban kynjoh 107 ron tang ha ka 13.4 over bad shah pynhap tang 2 ngut ban khur syndon ïa ka namlahduh da 6 wicket. Watla shah rem, ka Metallica Rising Stars ryngkat ka Lawsohtun CC ki la ïoh ban pynthikna ïalade ban jam sha ka kyrdan 2nd Division na bynta ka aïom lehkai ban wan.
Napdeng ki rangtied kiba la seisoh ki long u Changtre I Man Lamare u ba la tied 52 ron naki 24 bol bad u Kynsai Lyngkhoi u ba la tied 25 ron naki 36 bol. Katba ïa ka nam Player of the match la khur da u Hilar Thabah u ba la pynhap 4 wicket.
Nalor kane u Greatestful Lyngkhoi u ba la tied 138 ron bad 10 wicket naduh kaba sdang jong ka lympung u la ïohpdiang ïa ka khusnam Player of the tournament. Ha ka final jong ka kyrdan 2nd Division, ka Golflink 11 Star ka la rah ïa ka namlahduh hadien ba pynliem 12 ron ïa ka Metallica CC.
Ka Golflink 11 Stars ka la jied ban nyngkong hadien ba jop ïa ka toss bad ka la buh thong da 121 ron, shah pynhap 9 wicket haduh kaba kut jong ka 20 over. U Ankit Singh Rathor u la kamai 36 ron naki 20 bol, katba u Rahul Singh u la tied 25 ron naki 33 bol.
Na ki rangkawangbol, u Ajoy Das bad u Subham Mishra ki la ïoh ban khur mar 2 wicket na ki 3 over. Haba pyrshang ban beh ïa ka thong, ka Metallica CC ka la shah pynkhyllem lut baroh da tang 109 ron, kaba la pynlong ïa ka kynhun ban shahrem da 12 ron.
Ki rangkawangbol ka liang pyrshah kiba la tyngshaiñ ki long u Abid Khan u la khur 2 wicket naki 4 over, katba u Asif u ba la pynhap 3 wicket naki 4 over bad ban khur syndon ïa ka khusnam Player of the match.
ïa ka khusnam Player of the tournament ha kane ka kyrdan ïalehkai 2nd Division la khur da u Pritam Singh u ba la tied 168 ron bad 5 wicket naduh ba sdang ka lympung. Baroh ar kynhun ki la ïoh ban kyntiew ïalade sha ka kyrdan ïalehkai 1st division.
Ha kane ka sngi la ïadon ryngkatlang u Bah Gideon Kharkongor bad u Bah Samborlang Diengdoh, kiba la ïoh bynta ban sam ïa ki khusnam sha ki nongjop.