Shillong, Rymphang 16: Shuwa ba ka aïom lehkai 2023-24 jong ka Ranji Trophy kan sdang, na ka liang jong ka Meghalaya Cricket Association ki la shong pyrkhat halor ka nongrim- la ka jylla kan kynthup ne em ïa ki player ba na-bar (guest professional player) ha kane ka tournament.
Ka la long ka rai kaba jwat ïa ka synjuk, kumba la pynpaw da u President ka MCA-u Nababrata Bhattacharjee, hynrei, kumba ka long, ka Association ka la raikut ban shaniah tylli ha ki player kiba napoh jylla.
Watla kata ruh, kane ka rai kam shym la long ka jingbabe ïa ka jylla, hadien ba ka Meghalaya ka la ïohrung sha ka final ha ka Ranji Trophy Plate Group bad kan sa aireng pyrshah ïa ka Hyderabad ban sdang naduh mynta ka sngi Saitjaiñ. Ka jingïakhun kan sdang naduh ka por 9:30 baje mynstep ha Rajiv Gandhi International Stadium, ha Hyderabad.
Haba phaidien, ka Meghalaya ka la shimbynta ha ka Ranji Trophy naduh 2018-19, bad ha kine ki snem kam pat shym la pynduh ban khot ïa ki player ba nabar katkum ki kyndon pynïaid ka BCCI, ban mih madan ïa ka jylla. Ka jylla ka la ïoh jingshakri na katto katne ki player na bar kiba kynthup ïa u Punit Bisht, DB Ravi Teja lem bad kiwei, kiba la tyngshaiñ halor ki player kiba dei trai na Meghalaya ha kitei ki snem.
Ka kynhun ka mad katto katne ki jingeh mynta ka samoi – lai sien ki namjop ha ka round robin stage kaba la shah pynïaryngkat bad ar sien ki namrem. U Kishan Lyngdoh, kapten ka kynhun, u la pynkheiñ ïa ka record da kaba khyrwit 268 ron ban kylla long u player kriket ba nyngkong ka jylla Meghalaya ban khyrwit ar tylli ki spah ron ha ka Ranji Trophy ha ka sngi ïakhun ba nyngkong pyrshah ïa ka Arunachal Pradesh. Ha katei ka jingïakhun la ïoh ruh ban sakhi ïa u Ram Gurung u ba la tied ïa ka spah ron ha ka sien mih madan ba nyngkong.
Nalor kane, u Kishan u la bteng ban tyngshaiñ ha ka tied da kaba khyrwit san tylli ki 50 ron lane half-century ha ki jingïakhun ba dang sah, kiba kynthup kawei pyrshah ïa ka Hyderabad bad kawei ha ka semifinal pyrshah ïa ka Mizoram. U don mynta ha ka kyrdan ba 8 ha ka ri lyngba ki ron kiba la kamai mynta ka samoi – da 657 ron. Katba u Jaskirat Singh Sachdeva u la kamai mynta 295 ron.
Ki la don ruh katto katne ki rangkawangbol kiba la lah ban tyngshaiñ bha ïalade. Napdeng kine, u Akash Kumar Choudhury watla u la duh ban mih madan ha ar tylli ki jingïakhun ba sdang hynrei u la khur 10/79 pyrshah ïa ka Nagaland ha ka jingïalehkai kaba lai. U la lah ban pynneh ïa ka rukom lehkai ka jong u katba dang ïaid bad khur 31 wicket na saw sien ki jingïakhun, ha kaba u la wan ha ka thup ba 10 napdeng ki rangkawangb ol ba khur bun wicket mynta ka samoi.
Nangta u Aryan Borah, u ba don bynta ha ka kynhun U-23 men’s team na bynta ka Col CK Nayudu Trophy ha ka por ba u la shah khot ban mih madan ïa ka jylla ha ka Ranji Trophy ha ka jingïakhun kaba khadduh pyrshah ïa ka Sikkim. Ha kane ka jingïakhun, u la pyndep ïa baroh ar inning da 12/129 shuwa ban khur 10/107 ha ka semifinal, kaba la pynlong ruh ïa u ban shah kynthup ha ka kynhun na bynta ka final.
Ka namjop jong ka Meghalaya ha ka semifinal ka dei ka sien kaba nyngkong mynta ka samoi ba ka jylla kan jop ar sien lynter ki jingïalehkai.
Ka kynhun ka la sdang ïa ka namjop pyrshah ïa ka Arunachal Pradesh lyngba ka inning bad 172 ron shuwa ban shah rem ha ka Hyderabad lyngba ka inning bad 81 ron. Hadien kane ka la jop lyngba ka inning bad 128-ron ïa ka Nagaland shuwa ban liem ha ka Mizoram (da 191 ron). Katba ka jingïakhun ba khadduh na ka Group pyrshah ïa ka Sikkim bad ka semi pyrshah ïa ka Mizoramka jylla ka la jop da 6 wicket
Kaba dangsah mynta ïa ka jylla ka long pyrshah ïa ka Hyderabad. Baroh ar kynhun ki ladep ban pynthikna ban ïakhun ha ka Elite Group ha ka samoi ban wan hadien ba rung final hynrei baroh ar ki kwah ban khylliap ïa ka samoi da ka namjop.
Ka thup kyrteng jong ki player ka Meghalaya na bynta ka final Ranji Trophy Plate Group pyrshah ïa ka Hyderabad:
Akash Kumar Choudhury, Anish Charak, Arien B Sangma, Aryan Borah, Chengkam Sangma, Dippu Sangma, Jaskirat Singh Sachdeva, Kishan Lyngdoh (Captain), Pringsang Sangma, Ram Gurung, Riboklang Hynniewta, Raj Biswa, Sanvert Kurkalang, Swarajeet Das, Yogesh Tiwari
Standbys: Rounak Nongrum, Adarsh Joshi, Bijon Dey, Himan C Phukan, Manish K Rai, Lerry G Sangma
Support staff: Goutam Shome (head coach), Moisten Ch Marak (assistant coach), Vikash S Chauhan (trainer), Surojit Biswas (physio), Dister Marbaniang (manager)
