Shillong, Jymmang 15: Ka Jaiñtia Students’ Union (JSU) ha ka sngi Palei ha ka sngi Palei ka la ai por shibnai ïa ka District Selection Committee (DSC), West Jaiñtia Hills ba kan pynlong ïa ki eksam na ka bynta ki kam kiba lait kiba la dep ban pynbna ha ki saw snem mynshwa.
Ha ka jingthoh ba la phah da ka JSU ka la ong ba ha ka jingïalang kaba la long mynshwa bad Deputy Commissioner ka West Jaiñtia Hills District haba ïadei bad ka jingpynslem ban pynlong ïa ki eksam thungkam halor ki kam ba la pynbna ha ka 19 tarik jong u bnai Naiwieng 2021, ka la pynpaw ba ki don haduh 92 tylli ki kam kiba la lait ha ki tnat bapher bapher kiba dei ban khmih da ka District Selection Committee.
Ha ka jingïalang na ka liang jong ka JSU ka la maham tyngeh ïa u Deputy Commissioner ba lada um lah ban pynlong ïa ki eksam hapoh ka bnai ba la buh por na ka liang ka seng kan pynlong ïa ki jingïakhih bapher bapher pyrshah ïa kane ka kam ba la pynslem da ka ophis jong u.
Na ka liang ka JSU ka la kyntu ruh ïa u Deputy Commissioner ba un pynbna ïa baroh ki kam kiba lait kiba don ha ki tnat bapher bapher. Ka seng ka la ong ruh ba ka jingpynlong ïa ki eksam thungkam ha ka por ym tang ba kan wanrah ka jingmyntoi ïa ki samla ha ka ïohkam ïohjam hynrei kan ïarap ruh ban kyntiew ïa ka ïoh ka kot ha baroh ki liang ïa ka thaiñ West Jaiñtia Hills District.
